काठमाडौँ: व्यवस्थापिका-संसद्को आइतबारको बैठकमा स्वास्थ्यमन्त्री गिरिराजमणि पोखरेलले ‘स्वास्थ्य बीमा विधेयक, २०७४' प्रस्तुत गरेका छन्।
विधेयक पेश गर्दै उनले स्वास्थ्य सेवालाई प्रभावकारी, जनमुखी एवम् सहज बनाउनका लागि सरकारले विधेयक प्रस्तुत गरेको जानकारी दिए।
यस्तै संसद बैठकले ‘जातीय भेदभाव तथा छुवाछूत कसुर र सजाय पहिलो संशोधन विधेयक, २०७४ माथि विचार गरियोस्' भन्ने प्रस्तावलाई सर्वसम्मतिले स्वीकृत गरेको छ। सो विधेयक शुक्रबार गणपूरक सङ्ख्या नपुगेपछि स्वीकृत हुन सकेको थिएन ।
बैठकमा अर्थमन्त्री ज्ञानेन्द्रबहादुर कार्कीले प्रस्तुत गरेको ‘लेखापरीक्षण विधेयक, २०७३ माथि विचार गरियोस्' भन्ने प्रस्तावलाई सर्वसम्मतिले पारित ग¥यो ।
त्यसैगरी, बैठकले ‘अपाङ्गता भएका व्यक्तिको अधिकारसम्बन्धी विधेयक, २०७४' सर्वसम्मतिले स्वीकृत गरेको छ ।
त्यसअघि, महिला, बालबालिका, ज्येष्ठ नागरिक तथा समाज कल्याणमन्त्री आशा कोइरालाले ‘महिला, बालबालिका, ज्येष्ठ नागरिक तथा समाजकल्याण समितिको प्रतिवेदनसहितको अपाङ्गता भएका व्यक्तिको अधिकारसम्बन्धी विधेयक, २०७२ माथि छलफल गरियोस्' भनी प्रस्ताव प्रस्तुत गरेकी थिइन्।
बैठकमा उपप्रधानमन्त्री एवम् परराष्ट्रमन्त्री कृष्णबहादुर महराले प्रस्तुत गरेको ‘भूपरिवेष्टित विकासोन्मुख राष्ट्रका लागि अन्तर्राष्ट्रिय प्रबुद्ध समूह गठन गर्नेसम्बन्धी बहुपक्षीय सम्झौतालाई अनुमोदन गरियोस्' भन्ने प्रस्तावलाई सर्वसम्मतिले अनुमोदन गरेको छ।
रासस
प्रतिक्रिया दिनुहोस !
