अपहरणपछि हत्या गरिएका श्रेष्ठको सम्झनामा शान्तियात्रा

तुलसीपुर : मंगलबार नेवार समुदायले आफ्ना दिवंगत आफन्तको सम्झनामा गाईजात्रा मनाई रहेका बेला दाङका एक नेवार परिवारले भने आफना दिवगत सदस्यको सम्झनामा गाईजात्रा नभई शान्ति पदयात्राको र्‍याली निकालेका छन । अपराधिक समूहको अपहरण गरी गत जेठ २९ गते हत्या गरिएका दाङ तुलसीपुरका प्रतिष्ठित व्यवसायी राजकुमार श्रेष्ठको सम्झानामा परिवारले गाईजात्राको अवसरमा शान्ति पदयात्रा निकालेका हुन ।

नेवार समुदायमा पुर्खादेखि नै निकाल्दै आएको गाईजात्रालाई परिमार्जन गरेर श्रेष्ठ परिवारले शान्ति पदयात्रा निकालेको जनाएको छ । श्रेष्ठकी श्रीमती निर्मला श्रेष्ठले स्वर्गीय पतिको शान्तिको कामना गर्न गाईजात्रा नभई शान्ति पदयात्रा निकालिएको बताइन । शान्ति पदयात्राको अगुवाई ईश्वरीय विश्वविद्यालय राजयोग केन्द्र तुलसीपुर (ओम शान्तिका अनुयायी)ले गरेको थियो।

यस क्षेत्रका नेवार समुदाय, श्रेष्ठ परिवार र आम शान्तिका अनुयायीहरुको पदयात्रामा सहभागिता थियो । यात्रा श्रेष्ठको घरबाट ओम शान्तिमा पुगेर मृत आत्माको शान्तिको कामना गर्दै तुलसीपुर बजार परिक्रममा गरेको थियो । अन्य नेवार समुदायहरुले भने बर्षभरि परिवारमा मृत्यु भएका आफना सदस्यको सम्झानामा गाईजात्रा निकालेका छन । गाईजात्रा ननिकालेर शान्ति पदपात्रा निकाल्ने पहिलो परिवार श्रेष्ठ परिवार रहेको नेवार समाज दाङले वताएको छ।