किन रोकियो एसपी चौधरीको सरुवा ?

काठमाडौं : प्रहरी प्रधान कार्यालयले जिल्ला प्रहरी प्रमुखका रूपमा सरुवा गरिसकेका अधिकांश प्रहरी उपरीक्षक (एसपी)ले जिम्मेवारी सम्हालिसकेका छन् । धनुषा प्रमुखमा सरुवा भएकी एसपी मीरा चौधरी भने कहिले त्यता जानुपर्ने भन्नेमा बेखबर छिन् । ‘सरुवा भएकोबाहेक थप केही जानकारी छैन । हाल केन्द्रीय अनुसन्धान ब्युरोमै कार्यरत छु', एसपी चौधरीले अन्नपूर्णसँग भनिन् ।

प्रधानमन्त्री शेरबहादुर देउवाले एसपी चौधरीलाई धनुषा पठाउने निर्णय सच्याउन र हाल प्रमुख रहेका लालमणि आचार्यलाई नै कायम राख्न गृहमन्त्री जनार्दन शर्मा र प्रहरी महानिरीक्षक प्रकाश अर्याललाई निर्देशन दिएको चर्चा चलेको थियो । तत्कालीन गृहमन्त्री विमलेन्द्र निधिले गत भदौ २१ गते आचार्यलाई धनुषा प्रमुख बनाएका थिए । गृहजिल्लामा आफूनिकट आचार्यलाई स्थानीय निर्वाचनसम्म कायम राख्न निधिले नै प्रधानमन्त्री देउवालाई दबाब दिएको स्रोतले जनाएको छ । प्रदेश नम्बर २ को स्थानीय निर्वाचन आगामी असोज २ गते हुँदै छ ।

प्रहरी प्रधान कार्यालयले आफ्नो निर्णयमा कुनै फेरबदल नरहेको स्पष्ट पारेको थियो । गृहमन्त्री शर्माले जिल्लामा प्रमुख भएर गएका एसपीलाई केही दिनअघि मन्त्रालयमै बोलाएर गरेको छलफलमा चौधरीको पनि उपस्थिति थियो । २४ एसपी जिल्लाको नयाँ प्रहरी प्रमुख भएर गएका छन् ।

धनुषाका एसपी आचार्यलाई हेडक्वार्टर सरुवा गरिएको थियो । हेडक्वार्टर उच्च स्रोतका अनुसार गृहले एसपी चौधरीको सरुवा बदर नभए पनि उनलाई तत्काल रमाना नगर्न निर्देशन दिएको छ । ‘यसको मतलब मीराको सरुवा बदर भएको भन्ने होइन तर तत्कालको हकमा उनी धनुषा जाने छैनन्', स्रोतले भन्यो ।
यसले प्रहरी संगठनमा राजनीतिक हस्तक्षेप बढेको देखाएको अधिकारी बताउँछन् । ‘निर्णय कार्यान्वयन भएन भने संगठन कमजोर हुन्छ । व्यक्तिका लागि संगठनले सम्झौता गर्नुहुँदैन', एक उच्च अधिकारीले भने ।

एसपी आचार्यले भने आफू केही दिनमै हेडक्वार्टर जाने बताए । ‘मै सरुवा हुन इच्छुक छु । अहिले डीएसपी सा'बको पनि बढुवा भएर काठमाडौं गएकाले मैले कसैलाई जिम्मेवारी सुम्पिएर हिँड्ने अवस्था छैन', उनले भने । मध्यमाञ्चल क्षेत्रीय प्रहरी प्रमुख डीआईजी गणेश केसीले एसपी जिल्ला जाने क्रम जारी रहेको बताए । ‘मीराजी पनि आउँदै हुनुहुन्छ होला । अब दुई-चार दिनभित्र नआए मात्र शंका गर्नुपर्ला', डीआईजी केसीले भने ।