झापा जलमग्न, कन्काईमा खतराको संकेत, एकजना बेपत्ता

 

विर्तामोड : विगत चार दिनदेखि निरन्तर परेको वर्षाका कारण झापाका अधिकांश स्थान डुवानमा परेका छन् । रेडक्रस झापाका सभापति लोकराज ढकालले वर्षाका कारण झापाका अधिकांश क्षेत्र डुवानका परेको बताएका छन । ढकालले दिएको जानकारी अनुसार शनिबार राति ९ बजे मैनाचुलीमा कन्काइ नदीको पानीको तिह ५.५ मिलिमिटर पुगेको थियोे ।

पानीको सतह ४.२ भन्दामाथि पुग्नु खतरा मानिले ढकालले जनाए । झापाका कोरोबारी, कुमरखोद, पाठामारी लागायतका क्षेत्रहरु डुबानमा परेका छन् । यस्तै विर्तामोड, अर्जुनधारा, शनिश्चरे लगायतका क्षेत्र डुवानमा परेको जिल्ला आपकालिन सञ्चालन केन्द्र झापाले जानकारी दिएको छ ।

केन्द्रका अनुसार शनिबार शिवसताक्षी नगरपालिका १ का २८ बर्षिय लेखनाथ न्यौपाने (विजय) झिल्झिले खोलाले बगाएर बेपत्ता भएका छन् । उनी शिवगञ्ज गएर फर्कँदै गर्दा खोलाले बगाएको केन्द्रले जनाएको छ ।

रेडक्रस उपशाखा घेरावारी सभापति उमा गणेशका अनुसार कचनकवल गाँउपालिका वडा नम्वर १ मा भुतेनी खोला र जमुना खोलाको पानी बस्तीमा पस्दा ३ सय घर डुवानमा परेका छन् । मेची खोलामा पानीको वहाव बढ्दा वडा नम्वर ५ का ७० घर र वडा नम्वर ४ का एक सय घर डुवानमा परेको गणेशले जानकारी दिए ।

अविरल वर्षाका कारण झापाको गौरीगञ्ज १ हात्तीसारमा रहेको बाँध कनकाई नदीले भत्काएपछि बाढी गाउँमा पस्ने डरले स्थानीयबासी त्रसित बनेका छन् । वर्षा नरोकिने हो भने शिवसताक्षी–४ स्थित रंगेयाथान बजारसम्म डुवान हुन सक्ने स्थानीयबासीले बताए । वर्षा शुरु भएदेखि नै स्थानीयबासी रातभर सुत्न सकेका छैनन् ।

शिवसताक्षी १० मा हुन्द्रुगे खोलामा आएको बाढीले माइधारबाट चिल्लागढ जाने सडक बगाउँदा आवत जावत ठप्प बनेको छ । कनकाई खोलाको बाढीले झापा गाउँपालिका ७ स्थित दयाधाम जाने बाटोमा सानो माईखोलाको पुल नाघेको छ । त्यहाँको बस्ती जलमग्न भएका कारण स्थानीय विद्यार्थीहरु विद्यालयसमेत जान नसकेको बताइएको छ ।