राष्ट्रपतिले हेरिन् अग्निदहन

काठमाडौं : प्रायः राजनीतिक कार्यक्रम हुने राष्ट्रपति कार्यालयमा शुक्रबार अलि भिन्न कार्यक्रम थियो । बोक्साबोक्सी हुँदैन र बोक्साबोक्सीको आरोपमा कसैलाई दण्ड गर्न पाइन्न भन्ने तथ्यमा आधारित चलचित्र ‘अग्निदहन' हेर्न पाहुनाहरु प्रतिक्षा गरिहेका थिए । राष्ट्रपति विद्यादेवी भण्डारी हलभित्र प्रवेश गर्नासाथ चलचित्र ‘अग्निदहन' प्रदर्शन सुरु भयो ।

 ‘मान्छे बोक्सी हुन्न कहिल्यै राष्ट्रिय जागरण प्रतिष्ठान नेपाल'का संस्थापक अध्यक्ष कोविदशरण उपाध्यायले निर्माण गरेको करिब दुई घन्टा लामो चलचित्र हेरेपछि राष्ट्रपति भण्डारी चलचित्रको कथादेखि कलाकारसम्म राम्रा रहेको प्रतिक्रिया दिइन् । अन्धविश्वासका कारण नेपाली समाजमा अझै पनि यस्ता कुरीति र कुसंस्कार व्याप्त रहेका र यिनले मानव सभ्यताका साथसाथै विकासमा पनि बाधा पुर्‍याउने राष्ट्रपति भण्डारीको भनाइ थियो । ‘चलचित्रले समाजमा चेतना फैलाउन र सामाजिक जागरण ल्याउन ठूलो योगदान पुर्‍याउँछ', उनले भनिन् । तराईमा पनि बोक्सीको आरोपमा धेरै महिला पीडित हुने भएकाले चलचित्रलाई मैथिली र भोजपुरी भाषामा पनि डबिङ गरेर प्रदर्शन गर्न उनले सुझाव दिइन् ।

चलचित्रका निर्देशक घनश्याम लामिछाने र कथाकार लोकमणि पौडेल रहेका छन् । चलचित्रमा बोक्साबोक्सीमाथि हुने गालीगलौज, कुटपिट, सामाजिक बहिष्कारदेखि हत्या गर्नेसम्मका अमानवीय र जघन्य अपराधलाई चित्रण गर्ने प्रयास गरिएको छ । अनुपमा भण्डारी, प्रमिला तुलाचन, प्रकाश घिमिरे, माओत्से गुरुङ लगायतका कलाकारले अभियनय गरेको यस चलचित्रलाई ७५ वटै जिल्लाका कुनाकुनामा प्रदर्शन गरेर सामाजिक सचेतना जगाउने काममा संस्था क्रियाशील रहने भएको छ ।

अहिले देशमा दिनहुँजसो कोही न कोहीलाई बोक्साबोक्सीको आरोपमा यातना दिने अपराध भइरहेको छ । सरकारले ऐन बनाए पनि त्यसको प्रभावकारी कार्यान्वयन हुन नसक्दा बोक्साबोक्सीको आरोपमा कुटपिट गर्ने, काट्ने, मार्ने लगायतका घटनामा संलग्न दोषीको यकिन तथ्यांक बाहिर आउन सकेको छैन । त्यसैले सरकार र नागरिक दुवै पक्षबाट सहयोग भएमा आगामी १५ वर्षभित्र नेपालमा भएको बोक्सी कुप्रथालाई अन्त्य गर्ने सोच प्रतिष्ठानले बनाएको महासचिव श्रीभद्र पौडेलले बताए ।