पार्टी फेर्दै उम्मेदवार बन्दै
राजविराज : तेस्रो चरणको स्थानीय तह निर्वाचनमा उम्मेदवार बन्न दल फेर्ने क्रम बढेको छ । नौ नगरपालिका र नौ गाउँपालिका रहेको सप्तरीमा स्थानीय नेताहरूले दल फेर्न थालेपछि पुरानाभन्दा नवप्रवेशीले ठाउँ ओगटेका छन् ।दलहरूले टिकट दिँदै धमाधम नयाँलाई भित्र्याएपछि पार्टीमा योगदान गरेका पुराना नेता भने क्षुब्ध भएका छन् । आफू क्रियाशील दलबाट उम्मेदवारी नपाएपछि आकांक्षी पनि एउटा दलबाट अर्कोमा जाने होडबाजी नै चलेको छ ।
पूर्वराज्यमन्त्री अनिस अन्सारी राजविराज नगरपालिकाको मेयर उम्मेदवार बन्न पाउने भएपछि मंगलबार माओवादी केन्द्रमा प्रवेश गरे । उनी नेपाल सद्भावना पार्टीका संस्थापक महामन्त्रीसमेत हुन् । साविक पत्थरगाडा गाविसका पूर्वअध्यक्ष शिवनारायण साह, पूर्वउपाध्यक्ष हरिनारायण चौधरी र नर्घोका निवर्तमान उपाध्यक्ष सत्यनारायण यादव ‘सतो' बुधबार राजपामा प्रवेश गरे । डाक्नेश्वरी नगरपालिकामा पार्टीले अरूलाई नै उम्मेदवार बनाउने भएपछि कांग्रेसका पुराना कार्यकर्ता रहेका उनीहरू राजपा प्रवेश गरेका हुन् । राजपामा उनीहरूको उम्मेदवारी पक्काजस्तै रहेको नेता सत्यनारायण यादवले जानकारी दिए ।
एमालेबाट गाविस अध्यक्ष बनिसकेका निर्मल यादवले लोकतान्त्रिक फोरमबाट छिन्नमस्ता गाउँपालिकाको अध्यक्षमा टिकट पाउने भएपछि शनिबार मात्र पार्टी परिवर्तन गरे । तिरहुत गाउँपालिकाबाट एमालेका प्रत्याशी दीपेन्द्र लगरवार आफ्नो पार्टीबाट अध्यक्षको उम्मेदवार बन्न लागेको लोकतान्त्रिक फोरमका जिल्ला अध्यक्ष शैलेश चौधरीले बताए ।
–एउटा दलबाट अर्कोमा जाने होडबाजी
–पुरानालाई लत्याएर नयाँले ठाउँ ओगटे
–प्रतिबद्ध नेता/कार्यकर्ता हेरेका हेर्यै
–निर्वाचन परिणाम आकलन गर्न गाह्रो
अग्निसार कृष्णसवरण गाउँपालिकाको उपाध्यक्षमा माओवादी केन्द्रबाट प्रस्तावित कल्पना चौधरीलगायत बुधबार नयाँ शक्तिमा प्रवेश गरे । पार्टी प्रवेशलगत्तै नयाँ शक्तिले चौधरीलाई उपाध्यक्ष र अन्यलाई वडाध्यक्ष, सदस्यमा उम्मेदवार बनाउने निर्णय गर्यो । संघीय समाजवादी फोरम त्यागेका सुखराम यादव एमालेमा प्रवेश गरी प्रचारमा जुटिसकेका छन् ।
एमाले परित्याग गरेका बेल्ही चपेनाका विशो मण्डल कांग्रेसबाट उपाध्यक्षको उम्मेदवार बन्दै छन् भने कांग्रेस परित्याग गरेका जिल्ला सदस्य ओमप्रकाश मण्डलले एमालेबाट अध्यक्ष पदमा टिकट पाएका छन् । राजविराजको मेयरमा उम्मेदवारी सुनिश्चिततापछि राजपा परित्याग गरेका केन्द्रीय सदस्य भीमराज यादव संघीय समाजवादीमा प्रवेश गरी चुनावी दौडमा छन् ।
नवप्रवेशीले धमाधम टिकट हात पार्न थालेपछि पुराना कार्यकर्ता भने हेरेका हेर्यै भएका छन् । वडाध्यक्ष र सदस्यको टिकट पाउनेमा नवप्रवेशीकै बाहुल्य रहने देखिएको छ । यस्तो प्रवृत्तिले निर्वाचन परिणाम आकलन गर्न गाह्रो पारेको विश्लेषक बताउँछन् । निर्वाचनको मुखमा दल परिवर्तन गर्नेहरूलाई अवसर दिनुले दुःख गरेका कार्यकर्ता ओझेलमा परेको ई. सूर्यनारायण यादवको भनाइ छ । पार्टीहरूमा संस्थागत संस्कारको विकास हुन नसकेको शिक्षक रामकुमार यादवको बुझाइ छ । भन्छन्, ‘यस्तो परिपाटीले भविष्यमा पार्टीलाई नै हानि पुर्याउँछ ।'