राजनीतिसँगै बङ्गुरपालन
चरीकोट : आर्थिक विकास विना देशको विकास सम्भव नभएको भन्दै दोलखाका तिन जना नेताहरु व्यवसायीक बङ्गुर पालनमा सक्रिय भएका छन् । भीमेश्वर नगरपालिका वडा नम्वर ७ साखिनेमा डाफन नमूना ब्यवसायिक बङ्गुर फर्मको स्थापना गरेका छन् । सो बङ्गुर फार्म नेकपा (माले)का पोलिट व्यूरो सदस्य रेशम राजश्वराज रिमाल ,केन्द्रिय सदस्य बद्रीकुमार चौलागाई र नेत्र विक्रम चन्द (विप्लव) नेतृत्वको नेपाल कम्युनिष्ट पार्टी निकट शिक्षक सङ्गठन दोलखाकी अध्यक्ष मेनुका उप्रेतीले सयुक्त रुपमा सञ्चालन गरेका हुन । करिब ५ रोपनी जमिनमा फैलिएको सो फर्मले दुई महिना अघि देखी उत्पादन दिन थालेको जनाएको छ । फर्ममा हाल विभिन्न जातीका ६२ वटा बङ्गुर रहेका छन् ।
फर्मको मुख्य उद्देश्य उन्नत जातका बङ्गुरको पाठापाठी उत्पादन गरेर किसान तथा अन्य ब्यवसायिक फर्महरूलाई बिक्री वितरण गर्ने रहेको भएता पनि यसले मासु उत्पादन र प्रशोधनको समेत लक्ष्य लिएको कम्पनीकी प्रबन्ध सञ्चालक जिस्नु कुमारी उप्रेतीले बताइन् । उनले सो फार्ममा तीन सय बङ्गुर पालन गर्ने लक्ष्य लिइएको समेत बताइन । हाल सो फार्ममा पाख्रीबास कालो, मेहसान, योर्कसायर, ह्यामसायर, धराने कालो, ड्यूरोक तथा बँदेल प्रजातीका बङ्गुरहरू रहेको जनाएको छ ।
सो फार्ममा हिमाली आयोजनाको अनुदान तथा डाफन नेपाल प्रालीको करिब डेढ करोडको लागत रहेको सञ्चालक बद्रि कुमार चौलागाईको भनाइ रहेको छ । उनले राजनिति गर्न पैशा चाहिने र पैशा कमाउनकै लागि पनि यो पेशामा आफुहरु सक्रिय भएको जानकारी दिए । राजनितिमा लागेर धेरैको भविष्य विग्रिरहेको बताउदै सबै युवाहरुलाई व्यवसायमा लाग्न आग्रह गरे । बङ्गुर सुग्घरी र शान्तिप्रिय जनावर हो । यसको मासु खशि, कुखुरा तथा राँगो, भैसी भन्दा लाभदायक हुन्छ ।
किसानहरूले थोरै मात्रामा बङ्गुर पाल्दा फोहोर खानेकुरा (गार्भेज) पनि ख्वाएर पाल्न सजिलो हुने भए पनि ब्यवसायिक रुपमा बङ्गुर पाल्दा भने गार्भेजभन्दा घाँस र गुणस्तरीय दानामात्र खुवाउदा लाभदायक हुन्छ । त्यसो गर्दा बङ्गुरको बृद्धिदर तीब्र हुने, निरोगिता बढ्ने, मृत्यूदर घट्ने तथा मासु समेत स्वादिलो र स्वस्थकर हुने भएकोले पनि यो पेशा सुरु गरिएको सञ्चालक चौलागाईको भनाइ रहेको छ । काम गर्न लजाइएन भने बङ्गुर पालनमा आम्दानी राम्रो भएको बताउदै राजनिति सँगै व्यवसायलाई सँगै लैजान निकै चुनौती रहे पनि आफुहरुले त्यसलाई व्यवस्थीत गराउदै लगिरहेको जानकारी दिए । सो फार्ममा २ जनाले प्रत्यक्ष रुपमा रोजगारी पाइरहेको जनाएको छ ।
दोलखामा बङ्गुर व्यवसायको लागि राम्रो वातावरण रहेको जिल्ला पशु सेवा कार्यालय दोलखाका पशु चिकित्सक रामचन्द्र सापकोटाको भनाइ रहेको छ । दोलखा लगाएत राजधानीमा पनि बङ्गुरको माग रहेको बताउदै जिल्लाका धेरै कृषकहरुले व्यवसायीक रुपमा बङ्गुर पालन गर्दै आएको जनाएको छ । वङ्गुर पालनको लागि जिल्ला पशु सेवा कार्यालय दोलखाले पनि धेरै कृषकहरुलाई सहयोग गर्दै आएका छन् । जनजातीहरुको बाहुल्यता रहेको यस जिल्लामा बङ्गुरको मासुको माग भने धेरै रहेको जिल्ला पशु सेवा कार्यालय दोलखाले जनाएको छ ।