बिहान चार बजेसम्म मनोनयन दर्ता
बर्दिबास: महोत्तरीको १५ स्थानीय तहमा अबेर रातिसम्म मनोनयन दर्ता चलेको छ । बुधवार १० देखि सुरु भएको मनोनयन दर्ता बिहीवार बिहान ४ बजेसम्म पनि चलेको थियो ।
राजनीतिक दलहरु बुधवार दिउँसो अबेर गरेर स्थानीय निर्वाचन कार्यालयमा पुगेपछि मनोनयन दर्तामा ढिलाई भएको निर्वाचन कार्यालय बर्दिबासका निर्वाचन कार्यालयका प्रमुख मनिराम न्यौपानेले बताए । गौशाला नगरपालिकामा राति १२ बजे सम्म मनोनयन दर्ता चलेको सुरक्षाका लागि खटिएका डिएसपी शालिग्रााम शर्माले जनाए ।
राजनीतिक दलहरु प्रमुख पदको उम्मेदवारको टुङ्गो लगाएपनि वडा तहको उम्मेदवार मनोनयन दर्ताको दिनसम्म उमेदवार छनौट गर्न व्यस्त भएपछि मनोनयन दर्तामा ढिलाई भएको हो । जलेश्वर नगरपालिकामा १७ जनाले मेयर पदमा उम्मेदवारी दर्ता गराएका छन् भने, उपमेयरमा १२ जनाले मनोनयन दर्ता गराएका छन् ।
यस्तै, औरही नगरपालिकामा ११ जनाले मेयर पदमा उम्मेदवार दर्ता गराएका छन् । त्यसैगरी ९ जनाले औरही नगरपालिकामा उपमेयरमा उम्मेदवारी दर्ता गराएका छन्। त्यसैगरी भंगहा नगरपालिकाबाट ११ जना मेयर र ९ जनाले उपमेयरमा उम्मेदवारी दर्ता गराएका छन् । बलवा नगरपालिकाबाट ११ जना मेयर र ८ जना उपमेयरमा उम्मेदवारी दिएका छन् ।
उद्यमान शहर बर्दिवास नगरपालिकाबाट १४ जना मेयरमा उम्मेदवारी दिएका छन् भने ९ जनाले उपमेयमा उम्मेदवारी दर्ता गराएका छन् । पिपरा गाउँपालिकाबाट १२ जना अध्यक्ष र १२ जना उपाध्यक्षमा उम्मेदवारी दर्ता गराएका छन् । यस्तै, सोनमा गाउँपालिकाबाट १३ जना अध्यक्षमा उम्मेदवारीमा दर्ता गराएका छन् भने उपाध्यक्षमा ११ जनाले उपाध्यक्षमा उम्मेदवारी दर्ता गराएको महोत्तरीका प्रमुख निर्वाचन अधिकारी किरणकुमार पोखरेलले बताए ।
महोत्तरीमा ७२० पदको लागि हजारौंले उमेदवारी दिएका छन् । कहाँ कतिले उमेदवारी दिए भन्ने तथ्यांक संकलन भइरहेको छ । प्रारम्भीक तथ्यांक अनुसार ३ हजार ७ सय ८८ जनाले महोत्तरीमा विभिन्न पदमा उमेदवारी दिएको छ ।
प्रतिक्रिया दिनुहोस !
