धनकुटा बजारमा मालबाहक सवारी प्रवेशमा रोक
धनकुटा : चाडपर्व नजिकिएसँगै बजारमा चहलपहल र मान्छेको आवतजावत धेरै हुने भएकाले ठूला मालबाहक सवारी साधनलाई धनकुटा बजार प्रवेशमा रोक लगाइएको छ ।
धनकुटा बजार व्यवस्थापन समिति र सुरक्षा निकाय बीचको छलफलपछि ठूला मालबााहक सवारीलाई बजार प्रवेशमा रोक लगाइएको हो । बिहान ९ बजेदेखि १०.३० बजे र साँझ ३ बजेदेखी ४.३० बजेसम्म ठूला सवारीलाई प्रवेशमा रोक लगाएको जिल्ला प्रहरी कार्यालय धनकुटाका प्रहरी उपरीक्षक सुदिप राजभण्डारीले बताए ।
धनकुटा बजारमा चार चक्के गाडी र मोटरसाइकलको जथाभावी पार्किङलाई समेत रोक्ने निर्णय गरिएको उनले बताए । बजारको मदनचौक, अस्पताल अगाडी, चुवाको बोट र प्रहरी कार्यालय अगाडी मोटरसाइकल पार्किङस्थल तोकिएको छ । चार चक्के गाडीलाई प्रहरी कार्यालय नजिकै कारागारको जग्गा पार्किङस्थलमा तोकिएको छ ।
चाडपर्वमा यात्रुलाई मनपरी भाडा लिने, हुटमा राख्ने, गाडीमा चढ्न नदिने वा अपमानित गर्ने कार्यलाई रोक्न र सुरक्षाको लागि सहायता कक्ष राख्ने तयारी भइरहेको उनले बताए ।