बिरामी किन्ने अस्पतालले आफन्तलाई शव बुझायो

विराटनगर : उपचार खर्च नदिएको भन्दै विराटनगर न्युरो अस्पतालले आफ्नो नियन्त्रणमा राखेको मोरङको ग्रामथान गाउँपालिका २ पिडारवनीकी ६० वर्षीय गेरीदेवी माझीको शव परिवारलाई जिम्मा दिएको छ ।
शव राखेर आफन्तलाई अन्त्येष्टी गर्न नदिएको भन्दै चौतर्फी दवाब आएपछि परिवारका सदस्यलाई शव जिम्मा लगाउन अस्पताल तयार भएको हो । यस विषयमा आइतबार अन्नपूर्ण पोष्ट अनलाइन र सोमबारको अन्नपूर्ण पोष्ट दैनिकमा समाचार प्रकाशन भएको थियो । समाचार प्रकाशन नगरिदिन र अनलाइनमा पोष्ट भएको समाचार हटादिनका लागि अस्पताल प्रशासन एवं अस्पतालसंग कुनै पनि साइनो सम्बन्ध नै नभएका व्यक्तिहरुले समेत दवाब दिएका थिए ।
को १७ प १२५९ नम्बरको मोटरसाइकलको ठक्करबाट गत भदौ २८ गते राति घाइते भएकी माझीलाई उपचारका लागि न्युरो अस्पताल लगिएको थियो । पेटमा चोट लागेको भन्दै चिकित्सकले पेटको शल्यक्रिया गरिदिएका थिए । पेटको शल्यक्रियापछि थप उपचार गर्न थलिएको जानकारी आफन्तले पाए पनि शनिबार दिउँसो २ बजे अस्पतालले मृत्यु भएको जानकारी आफन्तलाई दिएको थियो । मृत्यु भएपछि अस्पतालमा शव निकाल्नका पुगेका आफन्तलाई उपचार खर्च नतिरेको भन्दै अस्पतालले शव दिन इन्कार गरेको थियो । आफन्त र परिवारका सदस्यले अन्त्येष्टी र काजक्रिया सकेपछि सम्पूर्ण रकम चुक्ता गर्ने भन्दै शव बुझाउन आग्रह गरे पनि अस्पतालले उपचार खर्च बापतको रकम नतिरिकन शव दिन नसकिने भन्दै फर्काइदिएको थियो ।

पारिवारिक स्रोतका अनुसार माझीको उपचार बापत अस्पताल र औषधि पसललाई तीन लाख ५५ हजार रुपैयाँ बुझाउन बाँकी थियो । दुर्घटनामा परेर घाइते भएकाको उपचार खर्च एकदमै महँगो भएको भन्दै चौतर्फी विरोध भएपछि अस्पतालले माझी परिवारलाई एक लाख रुपैयाँ छुट समेत दिएको छ । ‘अस्पतालले एक लाख रुपैयाँ छुट दियो । एक लाख रुपैयाँ तिरियो,’ गेरीदेवीका छोरा सुमनले भने, ‘बाँकी रकम पछि तिर्ने सहमति भएको छ । आमाको अन्त्येष्टी र काजक्रिया सकिएपछि खोजखाज गरेर र दुर्घटना गराउनेसंग समन्वय गरेर तिर्ने सहमति भएको छ ।’

राम्रो उपचार हुन्छ भन्ने सुनेर न्युरो लगिए पनि चिकित्सकले लापरवाहीपूर्ण तरिकाले शल्यक्रिया गरिदिएका कारण आमाको मृत्यु भएको उनले बताए ।
उपचार खर्च तिर्न नसक्दा माझी परिवारले शव नपाएको भन्दै पिडारवनी र बेलबारीका बासिन्दाले सहयोग जुटाएका थिए । बाँकी रहेको उपचार खर्च मध्ये अस्पताललाई बुझाइएको एक लाख रुपैयाँ पनि आफन्त, छिमेकी र शुभचिन्तकले सहयोग स्वरुप संकलन गरेको सुमनले बताए । शव आइतवार राति नै परिवारका सदस्य र आफन्तको जिम्मा लगाइएको हो । शवलाई राति नै कोसी अञ्चल अस्पताल विराटनगरमा पोष्टमार्टम गरेर आफन्तले जिम्मा लिएर लगेका छन् ।
दुर्घटना गराउने मोटरसाइकल चालक बेलबारी २ का ५० वर्षीय योगेन्द्र थापालाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ । दुर्घटना गराउने चालक थापाले पनि तत्काल आफूसंग उपचार खर्च तिर्ने रकम नभएको भन्दै पछि तिर्ने गरी शव आफन्तको जिम्मा लगाइदिन अस्पतालसंग आग्रह गरेका थिए । दुर्घटनाका घाइतेसंग न्युरो अस्पतालले उपचार बापतको रकम अत्यधिक लिने गरेको गुनासो चौतर्फी रुपमा आइरहेको छ ।
अस्पतालका प्रशासकिय अधिकृत सुरेश आचार्यले अस्पतालको केही रकम बुझाएपछि शव आफन्तलाई दिइएको बताए । ‘अस्पताल भित्र शल्यक्रिया लगायतका उपचार गराएको एक लाख ७६ हजार रुपैयाँ तिर्नु पर्ने थियो,’ उनले भने, ‘एक लाख रुपैयाँ तिरेपछि अरु छुट दिइएको छ ।’ आफन्तले उपचार बापतको खर्च तिरेर लैजाने भनेकाले उनीहरुकै सहमतिमा शव अस्पतालले राखिएको बताउँदै आचार्यले भने, ‘शव अस्पतालले आफन्तलाई नदिने नियत राखेको थिएन । दुई पक्षीय सहमतिमा शव आफन्तलाई बुझाइयो । उपचार र औषधीको बाँकी रहेको केही रकम पछि तिर्ने सहमति भएको छ ।’