२० वडाको पुन मतगणना हुँदा जनकपुरको परिणाम घोषणा भएन
जनकपुरधाम : प्रदेश नम्बर २ को प्रस्तावित राजधानीको रुपमा हेरिएको जनकपुर उपमहानगरपालिकामा राष्ट्रिय जनता पार्टी नेपाल मेयर पदमा दोब्बर मतले विजय निश्चित भएको छ । २५ वटा वडा रहेको उपमहानगरपालिकाको अन्तिम नतिजा सार्वजनिक भएपनि औपचारिक घोषणा भने हुन बाँकी छ ।
हालसम्मको मतगणना परिणाम अनुसार राजपा नेपालका मेयर पदका उम्मेदवार लालकिशोर साहले २१२७७ मत प्राप्त गरेका छन् भने उपमेयरमा राजपाकी रीता झाले १६६१७ मत पाएका छन् । त्यसैगरी उनका निकटतम प्रतिद्वन्द्वी नेपाली काँग्रेसका उम्मेदवार मनोज साहले १०६३९ र उपमेयरमा निलम कर्णले १०१०९ मत प्राप्त गरेका छन् ।
मेयर उपमेयरमा राजपा विजयी भएको सार्वजनिक भएपनि उपमहानगरपालिकाको २० नम्बर वडाको मतगणनामा मत नमिलेपछि पुनं मतगणना भइरहेकोले अधिकारिक घोषणा हुन नसकेको हो ।
राजपाको जित संगै उपमहानगरपालिकामा हाल कार्यकर्ताहरु निकै उत्साहित भएका छन् । मतगणना स्थलभरी रंगअबिर उडाउंदै राजपा कार्यकर्ताहरुले खुशियाली मनाइराखेका छन् । मेयरमा विजयी भएका साहले यसअघि जनकपुर नगरपालिकाको उपमेयर पद सम्हाली सकेका छन् ।
धनुषाको १८ तह मध्ये १७ तहको अन्तिम नतिजा सार्वजनिक भइसकेको छ ।
प्रतिक्रिया दिनुहोस !
