यस कारण सिरहामा कांग्रेस कमजोर
सिरहा : कांग्रेसबाट टिकट नपाउँदा माओवादी केन्द्र प्रवेश गरेका सिद्धार्थ यादव औरही गाउँपालिकाको प्रमुखमा निर्वाचित भए । कल्याणपुर नपा ६ का मोतीबुल राइन पनि कांग्रेसबाट टिकट नपाएकै कारण स्वतन्त्र वडाध्यक्षमा उम्मेवार बनेर चुनाव जिते । यादव र राइन उदाहरणका पात्र मात्र हुन् । कांग्रेसबाट टिकट नपाउँदा कैयौं नेता तथा कार्यकर्ता रुष्ट छन् । सधैं इमान्दार भएर संगठनमा बसेर जनताको सेवा गरेका उनीहरू टिकट पाउँदा सम्भवत: निर्वाचन जित्थे । तर योग्य उम्मेदवारलाई पार्टीले पाखा लगाएपछि सिरहामा कांग्रेस कमजोर सावित भएको छ ।
कांग्रेसका धेरै गढ माओवादी, फोरम र एमालेले भत्काएको छ । पहिलो संविधानसभाको चुनावमा कांग्रेसले सिरहाका चार निर्वाचन क्षेत्र कब्जा गरेको थियो तर स्थानीय तहको निर्वाचनमा सिरहाका १७ मध्ये दुई स्थानीय तह कल्याणपुर नपा र नवराजपुर गापा सीमित भएको छ । आर्थिक लोभमा परेर टिकट वितरण गरेको आरोप निर्वाचन अगाडि नै लगाएका कांग्रेस नेता नरेश यादव भन्छन्, 'समयमा टिकटको टुंगो नलगाउनु र केही धनाढ्य उम्मेवारसँग मोटो रकम लिएर टिकट बाँड्दा सिरहामा कांग्रेसको बेहाल भएको छ । यसको जिम्मेवारी जिल्ला सभापतिले लिनुपर्छ ।' 'जिल्ला सभापति रामचन्द्र यादवकै कारण पार्टी आन्तरिक विवादमा फसेको छ', उनले थपे ।
कांग्रेस कोषाध्यक्ष तथा पूर्वमन्त्री सीतादेवी यादवका छोरा पनि पराजित भएका छन् । उनका छोरा डा. सुवासचन्द्र यादव सिरहा नगरपालिकाको मेयर उम्मेदवार बनेका थिए । सिरहा नपाको मेयरमा संघीय समाजवादी फोरम नेपालका असेश्वर यादव र उपमेयरमा एमालेकी डा. नमिता यादवले जित हात पारेका छन् । डा. सुवास तेस्रो स्थानमा सीमित भए ।
जिल्ला सचिव उपेन्द्र यादव पनि सिरहा नगरका लागि मेयर उम्मेवारको आकांक्षी थिए तर टिकट पाएनन् । टिकट नपाएको झोकमा खुलेर गद्दारी गरेको आरोप उनीमाथि लागेको छ । कांग्रेस क्षेत्र नम्बर ३ का अध्यक्ष सञ्जयप्रकाश यादव भन्छन्, 'आन्तरिक विवादका कारण कांग्रेस जिल्ला सचिव उपेन्द्र यादवले खुलेर फोरमको भोट माग्नुभयो । अनि कसरी जित्छ कांग्रेस ? ' कांग्रेसले हार व्यहोर्नुको अर्को कारण समयमा टिकटको टुंगो नलगाउनु पनि हो', उनले थपे ।
कांग्रेस जिल्ला सभापति तथा सांसद रामचन्द्र यादव पनि आफ्नो नगर धनगढीमाई जोगाउन सकेन । धनगढीमाई नगरपालिकाबाट माओवादी केन्द्रले कब्जा गरेको छ । यहाँको मेयरमा माओवादी केन्द्रका हरिनारायण चौधरी र उपमेयरमा फूलकुमारी श्रेष्ठ विजयी भए । १४ वडा रहेको धनगढीमा एक मात्र वडा कांग्रेसले जित्यो । बाँकी १३ वडामध्ये ६ माओवादी र ७ एमालेले जितेको छ । यो परिणामले कांग्रेसको गढ माओवादी र एमालेले भत्काएको प्रष्ट हुन्छ । धनगढीका लागि कांग्रेसबाट गीताकुमारी साहलाई टिकट दिने पार्टीको निर्णयविपरीत जिल्ला सभापति यादवले सुनचाँदी व्यावसायी बिमला साहलाई उपमेयरको टिकट दिएका थिए ।
यस्तै लहान नगरपालिका घर भएका कांग्रेस सांसद तथा पूर्वमन्त्री पद्मनारायण चौधरीले पनि आफ्नो साख जोगाउन सकेनन् । कांग्रेसका नेता तथा सांसद प्रदीप गिरीको समेत घर भएको लहान नगरपालिका एमालेले कब्जा गरेको छ । सांसद चौधरीबाट दोस्रो संविधानसभाको चुनावमा पराजय व्यहोरेका तत्कालीन माओवादी नेता मुनी साह एमालेबाट टिकट लिएर लहानको मेयर बन्न सफल भए । एमालेकै सरियार चौधरी उपमेयरमा निर्वाचित भएकी छन् । यो क्षेत्र पनि कांग्रेसको गढ मानिन्थ्यो ।
कांग्रेस पूर्वकोषाध्यक्ष तथा पूर्वमन्त्री चित्रलेखा यादवले भने आफ्नो प्रतिष्ठा बचाएकी छन् । नवराजपुर घर भएकी उनको क्षेत्रमा कांग्रेसले जितेको छ । नेत्री यादवका सहोदर भाइ विश्वमोहन यादव नवराजपुरको प्रमुखमा र कांग्रेसकै शोभाकुमारी यादव उपमेयरमा विजयी भएका छन् ।