कांग्रेस र एमाले दुवैको रोजाइ माओवादी
भरतपुर : आफ्नो दलको हैसियत बढाउन चुनावी तालमेलको तयारीमा आफूहरू रहेको मुख्य तीन दलका नेताहरूले बताएका छन् । उनीहरूले प्रदेश र संघीय निर्वाचनका लागि उपलब्धिसहितको गठबन्धनका लागि कसरत गरेका हुन् । कांग्रेस र एमालेको गठबन्धनको रोजाइ माओवादी केन्द्र नै रहेको छ।
मंगलबार चितवन आएका तीन दलका नेताले आफू अनुकूल गठबन्धन गर्ने बताएका छन् । कांग्रेस, एमाले र माओवादी केन्द्रका नेताले आवश्यकताअनुसार तालमेल हुने बताएका छन् । चितवन पुगेका तीनै दलका नेताले छुट्टाछुट्टै आयोलित पत्रकार सम्मेलनमा पार्टीको तालमेल पार्टीको आवश्यकतामा निर्भर रहेको बताए ।
भरतपुर विमानस्थलमा गरिएका छुट्टाछुट्टै पत्रकार सम्मेलनमा माओवादी केन्द्रका अध्यक्ष पुष्पकमल दाहाल, एमाले वरिष्ठ नेता माधवकुमार र कांग्रेस केन्द्रीय सदस्य गगन थापाले पार्टीभित्रको तालमेल तयारीबारे चर्चा गरे ।
माओवादी केन्द्रका अध्यक्ष दाहालले प्रदेशको निर्वाचनका लागि तालमेल कोसँग गर्ने भन्ने विषयमा टुंगो नलागेको बताए । उनले प्रदेश र केन्द्रको निर्वाचनमा संघीय लोकतान्त्रिक पक्षधरसँग तालमेल गर्ने निर्णय गरेको भन्दै निष्कर्ष नभएको बताए । ‘देशभर तालमेल गर्न सबैसँग छलफल अगाडि बढेको छ’, उनले भने, ‘ कांग्रेस वा एमाले कोसँग तालमेल गर्ने भन्नेमा निचोड निस्किएको छैन ।’
प्रेस सेन्टर नेपाल चितवनले आयोजना गरेको पत्रकार सम्मेलनमा अध्यक्ष दाहालले राष्ट्रिय आवश्यकताका लागि तालमेल गर्न लागेको बताए । उनले पार्टीमा एक्लै निर्वाचन लड्ने विषय भए पनि राष्ट्रिय आवश्यकताका लागि तालमेल गर्न खोजेको बताए । तेस्रो चरणको निर्वाचनमा माओवादी केन्द्र उकालो लागेको भन्दै प्रदेशको निर्वाचनमा कांग्रेस-एमालेसँग बराबरीमा आउने दाबीसमेत गरे । ‘एक्लै चुनाव लडेर जित्ने कोसिसमा छैाँ’, उनले भने, ‘तर राष्ट्रिय आवश्यकताअनुसार तालमेल जरुरी छ भनेर छलफल गरेका हौं ।’
एमालेका वरिष्ठ नेता नेपालले भने आफूहरू माओवादी केन्द्रसँग तालमेल गर्न इच्छुक रहेको बताए । माओवादी केन्द्रले चाहे आफूहरू तालमेल गर्न तयार रहेको उनले बताए । बामपन्थी तालमेल आवश्यक रहेको उनको भनाइ थियो । ‘माओवादीसँग मिल्ने सम्भावना प्रवल छ’, उनले भने, ‘सके राष्ट्रिय रूपमै नभए प्रदेश र जिल्लामा पनि मिल्न सकिन्छ ।’ प्रेस चौतरीले गरेको पत्रकार सम्मेलनमा उनले कांग्रेससँगको तालमेलबारे भने केही बताएनन् ।
‘माओवादी-कांग्रेस मिलेर गए हाम्रो के लाग्छ र? ’, नेपालले भने, ‘यही त्यसो नभई माओवादी हामीसँग मिल्न चाहन्छ भने मिल्नुपर्छ र मिल्न तयार पनि छैाँ । एमालेले तालमेल गर्न चाहेको जानकारी दिँदै उनले माओवादीसँग कुरा भइरहेको बताए ।
कांग्रेस केन्द्रीय सदस्य गगनकुमार थापाले केन्द्रीय नेताको निर्णय र इच्छाले मात्र तालमेल नहुने बताए । पार्टीको स्थानीय तहदेखि केन्द्रीयस्तरमा ब्यापक छलफल र बहसपछि मात्रै तालमेल गरिने बताए । नेपाल प्रेस युनियन चितवनले आयोजना गरेको पत्रकार सम्मेलनमा नेता थापाले अबको निर्वाचनमा चुनावी मैदानमा पुगेपछि मात्र तालमेल नहुने बताए ।
‘पार्टीभित्र बहस नगरी एकैपटक पार्टीका नेताको निर्णय र इच्छाको भरमा तालमेल हुँदैन’, थापाले भने, ‘अबको रणनीतिबारे छलफल भएपछि मात्रै तालमेलको निर्णय हुन्छ ।’ उनले निर्वाचनअघिको तालमेलले मात्र परिणाम राम्रो आउने भन्दै त्यसमा जोड दिएका छन् । आफू प्रदेश नम्बर तीनको मुख्यमन्त्रीको आकांक्षी रहेकोसमेत उनले बताए । ‘पार्टीले जिम्मेवारी दिए नेतृत्व लिन तयार छु’, उनले भने, ‘मेरो इच्छा प्रदेश नम्बर तीनमा उम्मेदवार बन्ने इच्छा हो ।’ उनले आन्दोलनको स्वरूप परिवर्तन गर्न चिकित्सकलाई आग्रह पनि गरे । उनले आन्दोलनका कारण जनता उपचारबाट विमुख रहेको भन्दै वार्ता र संवादबाट निकास खोज्न आग्रह गरेका थिए ।
माओवादी अध्यक्ष दाहाल र कांग्रेस नेता थापा बीपी कोइराला मेमोरियल क्यान्सर अस्पतालले आयोजना गरेको अस्पतालको वार्षिकोतसव तथा राष्ट्रिय क्यान्सर सतर्कता दिवसमा सहभागी हुन आएका हुन् । एमाले नेता नेपाल पार्टीको जिल्ला प्रशिक्षणमा भाग लिन आएका हुन् । छुट्टाछुट्टै आएका उनीहरूका लागि पालैपालो पत्रकार सममेलन गरिएको थियो ।