महानवमीका दिन नुवाकोटका शक्तिपीठमा घुइँचो
अशोकवाटिका : दसैंको महानवमीका दिन शुक्रबार नुवाकोटका विभिन्न शक्तिपीठमा पूजाआजा गर्नेको घुइँचो लागेको छ । नुवाकोटको प्रसिद्ध र महत्वपूर्ण भैरवी, देवीघाटमा रहेको जालपादेवी, वगुवामा रहेको पञ्चकन्या, सिमुटारमा रहेको इन्द्रायणी, वेलकोटमा रहेको निरञ्जना भगवती, वनदेवीलगायतका मन्दिरमा पुजाआजा र दर्शनका लागि सर्वसाधारणको भीड लाग्यो । यस बाहेक जिल्लाका तारुका, बुधसिङ, दुइपिपल, भैरुमकोट लगायत स्थानमा रहेका कोट घरमा समेत पुजाआजा गरिएको छ ।
शक्तिपीठहरुमा पुजाआजाका लागि आउने सर्वसाधारणको संख्या वढे पनि वलि दिने कार्य गतवर्षको त३लनामा घटेको मन्दिरका पुजारीहरु वताउँंछन् । महानवमीका दिन नुवाकोटका तुलजा मौला, साततले दरवार अगाडिको मौला, लाम्पाटीमा रहेको छुट्टै मौला, कालिका मौलाका साथै भैरवी, जालपादेवी र इन्द्रायणी मन्दिरमा सरकारी तर्फबाट ७ वटा रांगा, ६ वटा बोका एउटा भेडाको थुमाको वलि दिइएको छ ।
यस वर्ष नुवाकोटका विभिन्न शक्तिपीठहरुमा पुजापाठ गर्नका लागि गत वर्षको भन्दा ५० प्रतिशत वढि सर्वसाधारणको भीड लागेको नुवाकोटको भैरवी मन्दिरमा भजनकिर्तनमा सहभागी वृद्ध अगुवा यज्ञराज केसीले बताए । सर्वसाधारणको धार्मिक आस्था वढेको पाइएको उनले बताए ।
पछिल्लो समयदेखि पशु वलिको सट्टा नरिवल चढाउने सास्कृति बढेको पाइएको छ ।गत १८०१ साल असोज १५ गते तेश्रो प्रयासमा नेपाल एकिकरणपछि तत्कालीन राजा पृथ्वीनारायण शाहले नुवाकोटमा दसैंं पर्व विशेष रुपमा मनाउन सुरु गरेको पाइन्छ । दसैैमा नुवाकोटको विभिन्न देवी मन्दिरहरुमा सरकारीतर्फवाट पुजापाठ हुने गरेको छ ।
घटस्थापनाको दिनदेखि महानवमीसम्म नुवाकोटका विभिन्न शक्तिपीठहरुमा बोका, कुखुरा, हाँसको बलि दिने गरिएको छ । महाष्टमी र महानवमीका दिन भैरवी तथा बेलकोटको निरञ्जना भगवती मन्दिरमा, फूलापती, कालरात्री र महानवमीका दिन भव्य मेला लाग्दछ ।
मेला भर्न छिमेकी रसुवाका साथै काठमाडौं, सिन्धुपाल्चोक, धादिङलगायतका जिल्लाबाट समेत भक्तजनहरु आउने गर्दछन् ।
प्रतिक्रिया दिनुहोस !
