एमाले र माओवादीबीच चुनावी तालमेलको घोषणा हुँदै, चुनाव चिन्ह आ-आफनै
काठमाडौ : नेकपा एमाले र नेकपा माओवादी केन्द्रका अध्यक्षद्धय केपी शर्मा ओली र पुष्पकमल दाहाल प्रचण्डले आगामी मंसिर १० र २१ गते हुने प्रदेश र प्रतिनिधिसभाको निर्वाचनमा चुनावी तालमेल गर्ने घोषणा गर्दैछन ।
एमाले अध्यक्ष केपी शर्मा ओली,बरिष्ठ नेताद्धय माधवकुमार नेपाल,झलनाथ खनाल र बरिष्ठ उपाध्यक्ष बामदेव गौतम र माओवादी अध्यक्ष पुष्पकमल दाहाल प्रचण्ड, बरिष्ठ नेताद्धय नारायणकाजी श्रेष्ठ र रामबहादुर थापा बादल सम्मिलित पार्टी एकता संयुक्त संयोजन समितिको मंगलबार बिहान बसेको बैठकले अपरान्ह ५ बजे राष्ट्रियसभा गृहमा चुनावी तालमेलको घोषणा गर्ने निर्णय गरेको माओवादी केन्द्रका अध्यक्ष प्रचण्डका प्रमुख स्वकीय सचिव जोखबहादुर महराले जानकारी दिए ।
संयुक्त घोषणापत्र बनाएर चुनावमा जाने, पार्टी एकता संयोजन समिति बनाएर जाने र चुनावपछि एकता गर्ने लगायतका विषयमा लिखित सहमति भएको महराले बताए ।
उनका अनुसार ६० प्रतिशत एमालेका उम्मेदवारले सूर्य चिन्हमा चुनाव लडनेछन् भने ४० प्रतिशत माओवादी केन्द्रका उम्मेदवारले गोलाकारभित्रको हसिया हथौडा चुनाव चिन्हमा चुनाव लडनेछन् ।
महराका अनुसार तालमेल भएका ठाउँमा एमालेका मतदाताले माओवादीका उम्मेदवारलाई गोलकारभित्रको हसिया हथौडा चिन्हमा मतदान गर्ने र माओवादीका मतदाताले एमालेका उम्मेदवारलाई सूर्य चिन्हमा मतदान गर्नेछन् ।
‘समानुपातिक र प्रत्यक्ष निर्वाचन प्रणालीमा आ आफनै चुनाव चिन्ह हुनेछन्’ महराले अन्नपूर्ण अनलाइनसँग भने ‘चुनाव भन्दा अगाडि पार्टी एकता हुँदैन,चुनावपछाडि हुन्छ ।’ उनका अनुसार बृहद बामपन्थी एकताका लागि नयाँ शक्ति नेपालका संयोजक बाबुराम भट्टराई र संघीय समाजवादी फोरमका अध्यक्ष उपेन्द्र यादवसँग पनि छलफल भइरहेको छ ।