जुम्लाका नेताले यसरी गरे तालमेलको स्वागत

जुम्ला : केन्द्रमा तीन पार्टीबीचमा एकताको प्रयास र तालमेलको सहमति भएसँगै जिल्लामा पनि यसको प्रत्यक्ष प्रभाव परेको छ । तीन दलको उक्त निर्णय देशको राजनीतिक परिवर्तनका लागि ऐतिहासिक निर्णय भएको भन्दै जिल्लास्थित नेकपा एमाले, माओवादी केन्द्र र नयाँ शक्ति नेपालले स्वागत गरेका छन्। 

दलहरुले बुधवार जुम्लामा पत्रकार सम्मेलन गर्दै पार्टी नेतृत्वले गरेको ऐतिहासिक एकताको निर्णय स्वागत योग्य रहेको र यथासीघ्र कार्यान्वयन गर्ने बिषयमा प्रतिबद्धता जनाएका छन् । मंगलबार नेकपा एमाले, माओवादी केन्द्र र नयाँ शक्तिको हस्ताक्षरमा भएको ६ बुद्धे सहमति बारे जानकारी दिन एमाले पार्टी कार्यालयमा ३ दलले संयुक्त पत्रकार सम्मेलन आयोजना गरी केन्द्रको निर्णय र निर्देशन जिल्लामा प्रभावकारी रुपमा कार्यान्वयन गरिने बताएका छन् ।

 

एकाएक एकताको प्रयासमा वामपन्थी पार्टीहरु पुगेपछि जुम्लामा तीनै दलको सहमतिमा दलका नेता कार्यकर्ता तथा जनतालाई यो एकताको स्वागत गर्न समेत आह्वान गरेका छन् । 

माओवादी केन्द्र जुम्ला संयोजक वीरबहादुर कुँवर, एमाले अध्यक्ष तिर्थ बुढा र नयाँ शक्ति नेपालका जिल्ला ईन्चार्ज नरेन्द्रनाथ योगीद्धारा संयुक्त हस्ताक्षरित विज्ञप्तीमा एमाले, माओवादी केन्द्र र नयाँ शक्तिले केन्द्रमा गरेको ६ वुँदे सहमतिलाई स्वागत गर्दै समर्थन गरिएको छ । विज्ञप्तिमा भनिएको छ, वि.सं ‘२००६ सालमा स्थापित नेपाल कम्युनिष्ट पार्टी वर्ग संघर्ष, विचारात्मक संघर्ष र व्यवहारिक प्रयोगका अनेक श्रृखला प्रयोग गर्दै यो अवस्थामा पुगेको छ । नेकपा एमाले, माओवादी केन्द्रको नीतिगत नेतृत्वले मुलुकमा गणतन्त्र, संघीयता, समानुपातिक समावेसिता, धर्मनिरपेक्षता र सामाजिक न्यायसहितको संविधान निर्माण भएको छ ।’

यसैगरी आगामी प्रतिनिधिसभा र प्रदेश सभामा भएको निर्वाचनमा जसले उम्मेदवारको अवसर पाएपनि एकमत भएर विजय गराउने निर्णय भएको छ । यसैगरी विज्ञप्तिमा अभियानलाई सफल पार्न क्रियाशिल वामपन्थी पार्टीहरु र स्वतन्त्र समूह सबैलाई एकता प्रक्रियामा सहभागि हुन आह्वान गरिएको छ । पत्रकार सम्मेलनमा पूर्व संस्कृति, पर्यटन तथा नागरिक उड्यन राज्यमन्त्री बलबहादुर महतले अब हिजोको बिषयलाई बिर्सेर एकमत भएर अगाडी बढ्नेमा सबैले सोच्नुपर्ने बताए । पार्टी एकताको प्रयास र आसन्न चुनावी तालमेल गर्ने सहमतिको स्वागत गर्दै तीन दलले दीप प्रज्वलनको आह्वान गरेका छन् । साँझ ६ बजे चन्दननाथ मन्दिर अगाडी दिप प्रज्वलन गर्ने र आगामी २० गते जिल्लामा तीनपार्टीबीचमा चियापान कार्यक्रमको आयोजना गरी शुभकामना आदान-प्रदान समेत गरिने बताइएको छ ।