कोरियाबासीलाई भावुक बनाए नेपाल आइडलका सुरजले

सिउल : एपीवान एचडी टेलिभिजनको बहुचर्चित रियालिटी शो नेपाल आइडलमा भाग लिएर चर्चामा रहेका सुरज थापाले कोरियामा रहेका नेपालीलाई पुनः भावुक बनाएका छन् । कोरियन पर्व 'छुसक'को अवसरमा अर्घाखाँची सम्पर्क मन्चले गरेको सुपा देउराली सांगितिक सौगात भाग १ मा सुरज थापाले झलकमान गन्धर्वको 'आमाले सोध्लिन नी खोइ छोरा भन्लिन्..' गीत गाइरहँदा उपस्थित नेपाली दर्शक भावुक भएका थिए भने दर्शकको आग्रहपछि थापाले सोही गित पुनः गाएका थिए ।

नेपाल आइडलका 'टप टेन' भित्र रहेका गायक आउने खबरपछि राजधानी सिउलको जोङनो ओगास्थित हल दर्शकले खचाखच भरिएको थियो । सुरजको प्रस्तुतिले दर्शकहरु मन्त्रमुग्ध समेत भएका थिए । सुरजले नेपाल आइडलको गाला राउण्ड अन्तर्गत बाइसौं संस्करणमा झलकमान गन्धर्वले गाएको भावुक गीत गाउँदा आइडल हेर्ने विश्वभरका दर्शकबाट वाहवाही पाएका थिए भने उनले सो इपिसोडमा 'यामाहा सलुटो पर्फमर अफ द डे' अवार्ड समेत हात पारेका थिए।

सांगितिक सौगातमा नेपाल आइडलका गायक सागर आले, चर्चित लोक गायक रामजी खाँड, सम्झना लामिछाने मगर, हाँस्य कलाकार दिनेश काफ्ले र डान्सर रश्मी तामाङले आफ्ना प्रस्तुति पस्केका थिए।

यसैगरी छुसकको लामो विदामा नेपथ्य कन्सर्ट, रबिन एण्ड द न्यू रिभ्युलुसन र मन्त्र ब्याण्डले पनि लाइभ कन्सर्ट मार्फत यहाँका नेपालीलाई मनोरञ्जन दिएका थिए । नेपालीको दसैं जस्तै यहाँको छुसक पनि कोरियनले हर्षोल्लासका साथ मनाउने गर्छन् भने यसपाली त विभिन्न विदा जोडेर सरकारले १० दिने विदा दिएको थियो । जसका कारण छुसकको हरेक दिन नेपाली संघसंस्थाको छुट्टाछुट्टै सांगितिक कार्यक्रमको आयोजना गरेका थिए । सांगितिक मनोरञ्जनमा भाग लिन राजधानी सिउलदेखि टाढा टाढाबाट आएका थिए । छुसकमा नेपालीले साथीभाई भेटघाट र राजधानी सिउल घुम्ने अवसरको रुपमा लिने गरेका छन् । अन्य दिनको कम्पनीमा लगातारको काम, थकानलाई विर्साउदै वर्षको एक पटक भएपनि टाढा रहेका साथीभाई एकै ठाउँ जमघट हुने अवसर कोरियन चाडले मिलाएको छ ।