'डमरुको डन्डीबियो'मा खगेन्द्र र मेनुका
काठमाडौं : दमदार अभिनयमा पर्याय बनेका खगेन्द्र लामिछाने नयाँ चलचित्रमा जुटेका छन् । चलचित्र लेखनमा सफल मानिएका छेतन गुरुङको लेखन तथा निर्देशनमा बन्न लागेको चलचित्र ‘डमरुको डन्डीबियो’मा उनी मुख्य भूमिकामा देखिन लागेका हुन् । काठमाडौं र लमजुङको घलेगाउँमा छायांकन यो चलचित्रको लेखनमा निर्देशक छेतनलाई कलाकार लामिछानेले पनि साथ दिएका छन् ।
शुक्रबार राजधानीमा पत्रकार सम्मेलन आयोजना गरी घोषणा गरिएको यस चलचित्रमा खगेन्द्रका साथमा रहने छिन् अभिनेत्री मेनुका प्रधान । मेनुकाको पनि पहिचान खगेन्द्रकै जस्तो छ । ग्ल्यामरस छवि बनाएका नायिकाको भीडमा मौलिक तर सबैले रुचाउने उनको अभिनय कौशल साँच्चिकै लोभलाग्दो छ ।
खगेन्द्र र मेनुकाको अभिनय एवं छेतेनको निर्देशनका कारण ‘डमरुको डन्डीबियो’ हेर्न लायकको चलचित्र बन्ने अपेक्षा गरिएको छ । चलचित्रमा खगेन्द्र, मेनुकाका साथै अनुप बराल, नमिता घिसिङ, बुद्धि तामाङलगायतले अभिनय गर्नेछन् । सुमी श्रेष्ठ घले र विनोद गुरुङको लगानीमा बन्न लागेको चलचित्रको छायांकन असोज २२ गतेबाट सुरु हुने निर्माण पक्षले जनाएको छ ।
डेढ करोड रुपैयाँको लागतमा बन्न लागेको यस चलचित्र लोपोन्मुख डन्डीबियो खेलमाथि आधारित छ । नयाँ विषय भएकाले जति चुनौती छ अवसर पनि उत्तिकै छ । दर्शक अहिले चलचित्रमा नयाँ विषय, नयाँ प्रयोग र प्रस्तुति खोजिरहेका छन् ।
प्रतिक्रिया दिनुहोस !
