गैंडाकोट (नवलपरासी) : नेपाल कम्युनिस्ट पार्टी (मसाल)का महामन्त्री मोहनविक्रम सिंहले वामपन्थी तालमेललाई ‘एकीकृत कम्युनिस्ट स्वरूप’ मान्न नसकिने बताएका छन् । एमाले, माओवादी केन्द्र र नयाँ शक्तिबीचको एकता एकीकृत कम्युनिस्ट पार्टी निर्माणको कदम भने पनि त्यस्तो नभएको उनको भनाइ छ । नवलपरासीको गैंडाकोटमा आयोजित पत्रकार सम्मेलनमा उनले छरिएर रहेका कम्युनिस्ट पार्टीबीचको दूरी मात्र कम भएको बताए । यद्यपि, उनले चुनावी एकता भए सकारात्मक रहेको टिप्पणी गरे ।
‘क्रान्तिकारी कम्युनिस्टवादी सिद्धान्तबाट विचलित भएका शक्तिबाट एकीकृत कम्युनिस्ट पार्टी बन्छ भन्ने विश्वास छैन’, उनले भने, ‘छरिएर रहेका माक्र्सवादी र लेनिनवादीहरूबीच अलिकति भए पनि दूरी घटेकोे छ, कम्युनिस्ट पार्टी निर्माणको कदम भने होइन ।’
भारतको चलखेलका कारण वामपन्थी दलहरूबीच फाटो आएको उनको भनाइ थियो । उनले राष्ट्रिय जनमोर्चाले निर्वाचनमा भाग लिने बताए । निर्वाचनमा कोसँग तालमेल गर्ने भन्ने विषयमा छलफल नभएको उनको भनाइ थियो ।
‘हामीले जित्दैनौं भन्ने थाहा छ तर निर्वाचन हाम्रो लागि संघर्षको माध्यम हो’, उनले भने, ‘संघीयताको विरोध भए पनि संविधानअनुसार पालना गरेका हौं ।’
प्रतिक्रिया दिनुहोस !
