सिट बाँडफाँट दुई दिनभित्रै

 

काठमाडौं : लोकतान्त्रिक गठबन्धनमा आबद्ध दलबीच सिट बाँडफाँटलाई दुई दिनभित्रै टुंगोमा पुर्‍याउने गरी प्रधानमन्त्री एवं कांग्रेस सभापति शेरबहादुर देउवा आइतबार बिहानैबाट छलफलमा जुट्ने भएका छन् । प्रतिनिधिसभाको २७५, राष्ट्रियसभाको ५९ र सात प्रदेशको ५५० गरी कुल ८८४ स्थानमा सबैको चित्त बुझ्ने गरी तालमेल मिलाउने विषयमा देउवाले सबै दलका शीर्ष नेतासँग छलफल गर्न लागेका हुन् । लोकतान्त्रिक शक्तिबीच तालमेलका लागि गठित सात सदस्यीय कार्यदलमा गठबन्धनभित्रका महत्वपूर्ण नेताहरूलाई कुनै न कुनै सदनमा पुर्‍याउने विषयमा सहमति जुटेको छ । कार्यदलको शनिबार साँझ प्रधानमन्त्रीनिवास बालुवाटारमा बसेको बैठकमा उक्त सहमति भएको हो ।

 

बैठकमा कार्यदल संयोजक विमलेन्द्र निधिले राजनीतिक ड्राफ्ट प्रस्तुत गरेका थिए । अन्य दलका नेताले भने मूल कुरा सिट तालमेल रहेकाले त्यस विषयमा निकासमा पुगेपछि अन्य कुरा स्वतः मिल्ने भन्दै त्यसका लागि कांगे्रसलाई नेतृत्व लिन आग्रह गरेका थिए । राप्रपा, फोरम नेपाल, राजपा, राप्रपा (प्रजातान्त्रिक) र फोरम लोकतान्त्रिकका प्रतिनिधिको सुझावलाई स्विकार्दै निधिले आइतबार कार्यदलमा सिट तालमेलसम्बन्धी एजेन्डामथि छलफल गर्ने जानकारी गराएको फोरम लोकतान्त्रिकका महासचिव रामजनम चौधरीले बताए । कांग्रेस सभापति देउवाले गठबन्धनका नेतासँग समेत अनौपचारिक वार्ता गर्ने जानकारी निधिले बैठकमा दिएका थिए ।

देउवाले सिट तालमेलका सम्बन्धमा दुई दिनभित्रै निष्कर्षमा पुग्ने गरी छलफल गर्न लागेको चौधरीले बताए । उनका अनुसार निधिले पेस गरेको ड्राफ्टमा ‘संघीय लोकतान्त्रिक गणतन्त्रलाई संस्थागत गर्न आन्दोलनकारी शक्तिहरू आगामी पाँच वर्षसम्म यसै गठबन्धनमा रहनुपर्ने’ उल्लेख छ । मधेस, थारू, मुस्लिम, जनजाति, आदिवासीलगायत आन्दोलनलाई समेट्दै तजा जनादेशमार्फत आउने प्रतिनिधिसभाबाट संविधान संशोधन गराउने प्रतिबद्धता पनि ड्राफ्टमा जनाइएको छ ।

प्रतिनिधिसभाको १६५ प्रत्यक्ष र ११० समानुपातिक, राष्ट्रियसभाको ५६ र प्रदेशसभाको ३३० प्रत्यक्ष र २२० समानुपातिक सिटमा एकमुस्ट तालमेल मिलाउने तयारी भइरहेको कार्यदलका अर्का सदस्यले बताएका छन् । प्रदेश १ मा प्रत्यक्ष ५६ र समानुपातिक ३७, प्रदेश २ मा प्रत्यक्ष ६४ र समानुपातिकमा ४३, प्रदेश ३ मा प्रत्यक्ष ६६ र समानुपातिक ४४, प्रदेश ४ मा प्रत्यक्ष ३६ र समानुपातिकमा २४, प्रदेश ५ मा प्रत्यक्ष ५२ र समानुपातिकमा ३५, प्रदेश ६ मा प्रत्यक्ष २४ र समानुपातिकमा १६ तथा प्रदेश ७ मा प्रत्यक्ष ३२ र समानुपातिकमा २१ जना चुनिनेछन् ।

उल्लिखित सबै संख्यामा मात्र नभएर प्रदेश २ मा प्रदेश सरकारसहितको बहुमत र संसद्मा पनि प्रदेश २ को हकमा कांग्रेस बराबरी सिटको दाबी फोरम नेपाल र राष्ट्रिय जनता पार्टीको रहेको स्रोत बताउँछ । कार्यदल सदस्य सर्वेन्द्रनाथ शुक्लाले कांग्रेसको अगुवाइमा आइतबारदेखि सिट वितरण कार्य हुने जानकारी दिए ।