महाकाली अञ्चल अस्पतालमा आकस्मिक बाहेकका सबै सेवा बन्द
महेन्द्रनगर : महाकाली अञ्चल अस्पतालमा आकस्मिक सेवा बाहेकका सबै सेवा बन्द भएको छ । शनिबार राति अस्पतालमा कार्यरत चिकित्सक, स्वास्थ्यकर्मीमाथि हातपात र अस्पतालको सुत्केरी वार्डमा तोडफोड भएको विरोधमा अस्पतालमा कार्यरत चिकित्सक र स्वास्थ्यकर्मीहरुले आकस्मिक सेवा बाहेकका सबै सेवाहरु आइतबार बिहान देखि बन्द गरेका हुन् ।
शनिबार बेलुका सुत्केरी गराउन ल्याइएकी एक महिलाले बच्चा जन्माउने क्रममा उनको बच्चाको मृत्यु भएपछि आक्रोशित आफन्तले चिकित्सक र स्वास्थ्यकर्मीमाथि हातपात गरेको तथा अस्पतालमा तोडफोड समेत गरेको भन्दै आकस्मिक बाहेकका सेवा बन्द गरेर चिकित्सक र स्वास्थ्यकर्मीहरु आन्दोलमा उत्रेका हुन् ।
शनिबार बेलुका अस्पतालमा सुत्केरी हुन आएकी भीमदत्त नगरपालिका १ बारकुन्डाकी एक महिलाले बच्चा जन्माउने क्रममा बच्चाको मृत्यु भएपछि आफन्त आक्रोशित बनेका हुन् । चिकित्सकको लापरबाहीका कारणले बच्चाको मृत्यु भएको उनीहरुको आरोप छ तर चिकित्सकले भने कुनै लापरबाही नभएको बताएका छन् ।
‘सुरुमा पाठेघरको मुख पुरै खुलिसकेको थिएन्, बच्चाको टाउको बर्थिङ क्यानलमा पुगेर अड्कियो' उपचारका क्रममा पुगेका चिकित्सक डा. सत्य कोइरालाले भने,‘ त्यो अवस्थामा कि त महिलाले नै प्रेसर दिनुपर्छ नभए टाउकोमा भ्याकुम लगाएर बच्चा निकाल्नुपर्ने हुन्छ' । उनले टाउँकोमा भ्याकुम लगाएर बच्चा निकालेपछि चेकजाँच गर्दा मृत्यु भइसकेको बताए ।
उनका अनुसार बच्चाको टाउको बर्थिङ क्यानलमा अड्किएपछि बच्चाले दिशा गरेको र सोही दिशा नाक, मुख हुदै फोक्सो सम्म पुगेकाले बच्चाको मृत्यु भएको हुन सक्ने बताए । सुरुमा सुत्केरी व्यथा लागेपछि ल्याउदा चिकित्सकले शिशु र महिलाको अवस्था सबै राम्रो छ भने' सुत्केरी हुन आएकी सरस्वती विष्टकी सासु कमला विष्टले भनिन्,‘पछि चिकित्सकहरुले यस्तो समस्या रैछ र बच्चाको मृत्यु भयो भने' ।
उनले चिकित्सकको लापरबाहीकै कारणले बच्चाको मृत्यु भएको भन्दै कारबाही हुनुपर्ने बताइन् । बच्चाको मृत्यु भएपछि बिरामीका आफन्तले चिकित्सक डा. सत्य कोइरालामाथि हातपातको प्रयास गरेका थिए । सो क्रममा ड्यिुटीमा खटिएका प्रहरीका जवान प्रतासिंह बोहराको टाउकोमा चोट लागेको छ । उनको टाउकोमा ४ टाँका लागेको र उपचारका लागि खटिमा लगिएको छ ।
बिरामीका आफन्तले चिकित्सक र स्वास्थ्यकर्मीहरुमाथि नै आक्रमण गर्ने कामले असुरक्षित भएको भन्दै आकस्मिक बाहेकका सेवा बन्द गर्ने निर्णय गरेका हुन् । स्वास्थ्यकर्मी आबद्व विभिन्न संगठनहरुले समेत ऐक्यबद्वता जनाएका छन् । चिकित्सकहरुले सुरक्षाको प्रत्याभूति हुनुपर्ने माग गरेका छन् ।
अस्पताल प्रशासनले समेत चिकित्सकमाथि आक्रमण गर्नेलाई कारबाही हुनुपर्ने माग राखेको छ । प्रहरीले आक्रमण र तोडफोडमा संलग्न रहेको भन्दै ५ जना बिरामीका आफन्तलाई पक्राउ गरेको छ । आकस्मिक बाहेकका अन्य सबै सेवाहरु अचानक बन्द भएपछि उपचारका लागि आएका बिरामीहरु मर्कामा परेका छन् । उनीहरु उपचार नै नगराई घर फर्किन वाध्य भएका छन् ।
प्रतिक्रिया दिनुहोस !
