एजेन्सी : बलिउडमा सलमान खानसँग जोरी खोज्ने साहस सायदै कुनै कलाकारले राख्छन् । उनीसँग दुस्मनी मोल्दाका परिणाम धेरै कलाकारले भोगिसकेका छन् । साथ दिनुपर्दा तनमन दिने, नदिँदा झिँगालाई जति पनि नगन्ने उनको स्वभाव गजबको छ । यो वास्तविकता थाहा पाउँदापाउँदै पनि जुबेर खान सलमानविरुद्ध उत्रिएका छन् ।
सलमान खानले होस्ट गर्दै आएको चर्चित भारतीय रियालिटी सो बिग बोसका सहभागी जुबेरले सोबाट बाहिरिएलगत्तै प्रहरीमा सलमानविरुद्ध उजुरी दर्ता गराएका हुन् । उनले सोमा सहभागी भएको दिनदेखि नै अन्य प्रतिस्पर्धीसँग अभद्र व्यवहार गर्नुका साथै महिला सहभागीसँग असभ्य भाषा बोलेपछि सोका सञ्चालक सलमान खान उनीविरुद्ध खनिएका थिए । गत शनिबार प्रसारित सोमा जुबेरलाई सलमानले निकै थर्काएका थिए । सलमानकै कारण जुबेर सोबाट बाहिरिएको बताइएको छ ।
सोबाट बाहिरिएपछि उनले सलमानको धम्कीका कारण आफू असुरक्षित भएको भन्दै प्रहरीमा उजुरी दिएका हुन् । उनले दर्ता गरेको उजुरीमा आफूलाई सलमानले कुकुर बनाउँछु भनेको, बाहिर निस्किएपछि नछोड्ने, बलिउडमा काम नै गर्न नदिने धम्की दिएको आरोप लगाएका छन् । सलमानका कारण आफ्नो ज्यान खतरामा रहेकाले प्रहरीलाई गुहार्न बाध्य भएको पनि उनले उल्लेख गरेका छन । जुबेर सलमानसँग बदला लिने दाउमा रहे पनि प्रहरीले कसरी लिन्छ, हेर्न बाँकी छ ।
प्रतिक्रिया दिनुहोस !
