अब निर्मात्री अशिष्मा
काठमाडौं : अभिनेत्री अशिष्मा नकर्मीले नयाँ परिचय थपेकी छन् । अब उनको परिचयमा ‘निर्मात्री’ शब्द पनि थपिने भएको छ । अशिष्माले नेपाल भाषाको चलचित्र ‘लाखे भाजु’ निर्माण गर्ने भएकी हुन् ।
मंगलबार राजधानीमा चलचित्र निर्माणको घोषणा भएको छ । नेवार समुदायको नयाँ वर्ष नेपाल संवत् नजिक आइरहँदा नेवार चलचित्र निर्माणको घोषणा भएको हो । नेवार समुदायको परम्परागत लाखे नाचमा आधारित चलचित्रमा एक युवाको प्रेमकथा समेटिनेछ । अशिष्माले पहिलेदेखि ऐतिहासिक चलचित्र निर्माण गर्ने इच्छा व्यक्त गर्दै आएकी थिइन् । उनको यो रहर बल्ल पूरा हुने भएको छ ।
नेवार समुदायको पाटो महत्वपूर्ण संस्कृति लाखे नाचको ऐतिहासिक कथा भएकाले यो चलचित्रले उनलाई आकर्षित गर्यो । नेपाली चलचित्रमा चार वर्षको अनुभव भए पनि नेपाल भाषाको चलचित्रमा उनले काम गर्न थालेको ११ वर्ष भइसक्यो । भनिन्, ‘अब नेपाल भाषाको लागि योगदान गर्ने बेला भयो, त्यसैले चलचित्र निर्माण गर्न लागेकी हुँ ।’ केही वर्षयता अभिनेत्रीहरूले चलचित्र निर्माणमा रुचि देखाउन थालेका छन् । यसअघि अभिनेत्रीहरू रेखा थापा, झरना थापा, निशा अधिकारी, दीपा श्री निरौलालगायतले चलचित्र निर्माण गरिसकेका छन् ।
अशिष्माले चलचित्रमा मुख्य भूमिका निभाउनेछिन् । चलचित्रमा ‘लाखे भाजु’ मा सोहित मानन्धर, मदनदास श्रेष्ठ, नगिना जोशी, कृष्णभक्त महर्जनलगायतका कलाकारको अभिनय रहनेछ । अशिष्माका गुरु आर्यम नकर्मीले चलचित्र निर्देशन गर्नेछन् । ५० लाख रुपैयाँको लागतमा बन्ने चलचित्रको कथा पनि आर्यमले लेखेका हुन् । नरेन्द्र महर्जन, गोपालकाजी कायस्थ, चिजकुमार श्रेष्ठ, सुन्दर राजभण्डारी र दीपक श्रेष्ठको साथले चलचित्र निर्माताको रूपमा प्रस्तुत हुन लागेको बताइन् । संसारभरि छरिएर बसेका नेपालीले आफ्नो जात र संस्कृतिलाई खोज्न थालेका छन् । युरोप र अमेरिकामा चलचित्र ‘लाखे भाजु’ को प्रदर्शन लिइसकेका छन्।
प्रतिक्रिया दिनुहोस !
