पोखरा : नेपाल आइडलका विजेता बुद्ध लामा, फस्ट रनरअप निशान भट्टराई, सेकेन्ड रनरअफ प्रताप दास र सन्ध्या जोशीले आज गीतसंगीतले पोखरा तताउँदै छन् । इभेन्ट कम्पनी ‘मुन्टेज इन्टरनेसनल’ले स्थानीय जक्सन डटकमको सहकार्यमा शनिबार पोखराको नयाँबजारस्थित प्रदर्शनी केन्द्रमा कन्सर्ट आयोजना गरेको छ ।
कन्सर्टका लागि निशान भट्टराई, प्रताप दास र सन्ध्या जोशी पोखरा आइपुगेका छन् । नेपाल आइडलको ग्रान्ड फिनालेपछि राष्ट्रियस्तरमा यी गायक सम्मिलित कन्सर्ट हुन लागेको यो पहिलोपटक हो । नेपाल आइडल बुद्ध लामाको होम टाउन पोखरामा हुन लागेको पहिलो कन्सर्टमा १० हजार दर्शकको सहभागिता रहने विश्वास आयोजकले गरेका छन् ।
नेपाल आइडलको विजेता बुद्ध लामाको होम टाउन भएकाले पोखरेली गीत संगीत प्रेमीको ठूलो सहभागिता रहने आशा गरेको मुन्टेज इन्टरनेसनलका म्यानेजिङ डाइरेक्टर रोशन पराजुलीले बताए । ‘नेपाल आइडलप्रति यहाँको दर्शकको क्रेज निकै भएकाले यो कन्सर्ट निकै भव्य हुने विश्वास छ’, पराजुलीले भने । नेपाल आइडलका टप टेन फाइनलिस्टलाई कन्सर्टमा सहभागी गराउने उद्देश्य भए पनि केही फाइनलिस्ट गायक विभिन्न देश गएकाले सबैलाई सहभागी गराउन नसकिएको उनले बताए ।
पोखरामा शुक्रबार आयोजित पत्रकार सम्मेलनमा नेपाल आइडलका फस्र्ट रनरअप निशान भट्टराईले कन्सर्टमा पोखरेलीको अपार माया पाउने आशा व्यक्त गरे । पोखरामा दोस्रोपटक आएका निशानले पोखरेलीको माया पाउनेमा उत्साहित हुँदै शनिबारको प्रतीक्षा रहेको बताए । पत्रकार सम्मेलनमा सेकेन्ड रनरअफ प्रताप दास र टप नाइन सन्ध्या जोशी पनि सहभागी थिए ।
कन्सर्ट दिउँसो ४ बजेदेखि ८ बजेसम्म चल्ने जक्सन डटकमका म्यानेजर अरुण गिरीले बताएका छन् । नेपाल आइडलकै होस्ट सुशील नेपाल र निशा पन्थीले कन्र्सट होस्ट गर्ने बताइएको छ । मुन्टेज इन्टरनेसनलले पोखरासँगै यो कन्सर्ट उर्लाबारीमा समेत गर्ने जनाएको छ । असोज ३० गते उर्लाबारीमा कन्सर्ट हुने पराजुलीले बताए । विश्वमै नेपाल आइडलको क्रेज भएकाले नेपाल आइडलका टप थ्री वल्र्ड टुरमा निस्कन लागेको पनि उनले सुनाए । उनले नोभेम्बरको पहिलो हप्ता बेलायतका विभिन्न सहरमा नेपाल आइडलको कन्सर्ट आयोजना गर्ने बताए ।
प्रतिक्रिया दिनुहोस !
