नुवाकोटमा दुईवटै निर्वाचन अधिकृतको कार्यालय सञ्चालनमा
नुवाकोट : आगामी मंसिर १० गते तय भएको प्रदेश तथा संसदीय निर्वाचनका लागि नुवाकोटमा दुई वटै निर्वाचन अधिकृतको कार्यालय स्थापना गरिएको छ । पहिलो चरणमा निर्वाचन सम्पन्न हुने ३२ जिल्लामध्ये २ वटा निर्वाचन क्षेत्र कायम भएको नुवाकोटको विदुरमा आइतबार दुइवटै क्षेत्रका लागि निर्वाचन अधिकृतको कार्यालय स्थापना गरिएको हो ।
कोष तथा लेखा नियन्त्रण कार्यालयको भवनमा मुख्य निर्वाचन अधिकृतको कार्यालय स्थापना गरिएको छ । सदरमुकाम विदुर समेटिएको २ नं. निर्वाचन क्षेत्रको कार्यालयमा जिल्ला न्यायाधीश लोकजंग शाह मुख्य निर्वाचन अधिकृतको रुपमा रहेका छन् । सो कार्यालयकोे शुभारम्भ गर्दै शाहले एकै दिन तय भएको प्रदेश र संसदीय निर्वाचनको आचारसंहिता पालना गराउन आफु क्रियाशील रहने बताए ।
शाहले गत वैशाख ३१ गते नुवाकोटमा स्थानीय तहको निर्वाचनमासमेत मुख्य निर्वाचन अधिकृतको भुमिका निभाएका थिए । कार्यालयको स्थापनासँगै निर्वाचन सम्बन्धी कामकाज सुरु भएको मुख्य निर्वाचन अधिकृत शाहको भनाई छ ।
आगामी कार्तिक ५ गते दुबै निर्वाचन अधिकृतको कार्यालयमा प्रदेश तथा संसदीय निर्वाचनमा उठ्ने उम्मेदवारहरुको मनोनयन पत्र दर्ता गरिने कार्यक्रम तय भएको छ । प्रतिनिधिसभाका लागि दुई वटा निर्वाचन क्षेत्र रहेको नुवाकोटमा मुख्य निर्वाचन अधिकृतको कार्यालयले प्रतिनिधिसभाको निर्वाचन क्षेत्र नं. २ र सो क्षेत्र अन्तरगत प्रदेश निर्वाचन तर्फको क्षेत्र नं. १ र २ को निर्वाचन सञ्चालन गर्ने गरि कार्यालय स्थापना भएको हो ।
प्रतिनिनिसभा क्षेत्र नं १ को निर्वाचन अधिकृतको कार्यालय पनि डिभिजन सहकारी कार्यालयको भवन विदुरमा स्थापना गरिएको छ । क्षेत्र नं. १ को कार्यालयले सो क्षेत्र र अन्तरगतका प्रदेश तर्फको क्षेत्र नं. १ र २ को पनि निर्वाचन सञ्चालन गर्ने जिम्वेवारी रहेको निर्वाचन अधिकृत गोपाल लामिछानेले जानकारी दिए ।
मुख्य निर्वाचन अधिकृतको कार्यालयमा विभिन्न पदका लागि १८ जना र निर्वाचन अधिकृतको कार्यालयका लागि १६ जना कर्मचारी आवश्यक पर्ने र यसको तयारी सुरु भएको मुख्य निर्वाचन अधिकृत शाहले जानकारी दिए । निर्वाचन सम्पन्न गराउन एकहजार ६ सय कर्मचारी आवश्यक पर्ने जनाइएको छ ।