पाँचथरमा धमाधम मनोनयन दर्ता : कांग्रेसलाई राप्रपाको साथ
फिदिम : मंसिर १० गते हुने प्रतिनिध र प्रदेशसभाका लागि पाँचथरमा धमाधम मनोनयन दर्ता भइरहेको छ । बिहान १० बजेदेखि सुरु भएको मनोनयन दर्ता कार्यक्रममा नेपाली कांग्रेस, वाम गठबन्धनका एमाले र माओवादी केन्द्र, संघीय समाजवादी फोरम र संघीय लिम्बूवान मञ्च नेपालले मनोनयन दर्ता गरिसेका छन् ।
राप्रपाको समर्थनमा कांग्रेसले प्रतिनिधिसभाका लागि कांग्रेसका केन्द्रीय सदस्य भिष्मराज आङ्देम्बे र प्रदेशसभा (क) मा कांग्रेस जिल्ला सभापति नरेन्द्रकुमार केरुङ र (ख) का लागि महासमिति सदस्य सुरेन्द्रकुमार दाहालको उम्मेद्वारी दर्ता गराएको हो ।
वाम गठबन्धकाबाट प्रतिनिधिसभाका लागि एमालेका बसन्त नेम्वाङ र प्रदेशसभा (क) का लागि निवर्तमा सांसद गणेश काम्वाङ र प्रदेशसभा (ख) मा माओवादी केन्द्रका मौसम लिम्बूको उम्मेद्वारी दर्ता गराएको हो ।
संघीय समाजवादी फोरम नेपालले प्रतिनिधिसभाका लागि प्रेमराज लावती र प्रदेशसभा (क ) का लागि बृखबहादुर वाइवा र (ख) का लागि एविराज आङ्देम्बेको उम्मेद्वारी दिएको हो । त्यस्तै संघीय लिम्बूवान मञ्च नेपालले पनि प्रतिनिधि सभाका लागि सागर केरुङ र प्रदेशसभा (क) मा हर्कजंघ लिङ्देन (ख) का लागि लावाहाङ चेम्जोङको उम्मेद्वारी दर्ता गराएको हो ।
साँझ पाँच बजेसम्म मनोनयन दर्ता गरिने मुख्य निर्वाचन अधिकृत मनोजकुमार केसीले जानकारी दिए । मनोनयन दर्ता गर्दै आङ्देम्बेले लोकतान्त्रिक शक्तिको समर्थनमा कांग्रेसले मनोनयन दर्ता गराएको बताए । उम्मेद्वारी दर्ताको क्रममा दलहरुले मुख्य निर्वाचन अधिकृतको कार्यालयमा आफ्ना कार्यकर्तासमेत उतारेका छन् ।