दमौलीः नेपाली कांग्रेसका पूर्व सह महामन्त्री एवं पूर्व गृहमन्त्री गोविन्दराज जोशीले कांग्रेस बीपीको आदर्शबाट बिमुख भएको आरोप लगाएका छन् । पछिल्लो समय कांग्रेसले नीतिगत भन्दा पनि सत्ताको राजनीतिले प्रेरित भएर गठबन्धन गरेको उनले गुनासो गरे । तनहुँको दमौलीमा पत्रकारहरुसँग कुराकानी गर्दै उनले यस्ता गतिविधिले कांग्रेसलाई आफ्नो आदर्शबाट बिचलित गराएको बताए ।
विगतको चुनावमा माओवादी केन्द्रसँगको सहकार्य तथा अहिले नयाँ शक्तिलगायतका दलसँगको गठबन्धन सबै सत्ताकेन्द्रित भएको उनको भनाई थियो ।
नेपाली कांग्रेसका तर्फबाट तनहुँ क्षेत्र नम्बर १ का प्रतिनिधिसभा सदस्य निर्वाचनमा प्रत्यासी जोशीले आफूलाई पार्टीले टिकट दिनुपर्ने धारणा राखे ।
पार्टी वरिष्ठ नेता रामचन्द्र पौडेलले चुनाव लड्ने घोषणा गरेको क्षेत्रमा चुनाव लड्ने तयारीका साथ पार्टी टिकटका लागि लबिङ गर्दै आएका उनले आफूलाई उठाए मात्र सो क्षेत्रमा जित निश्चित रहेको बताए । पार्टीमा वरिष्ठ नेताको पहिचान बनाइसकेकाले पौडेलले अरु कुनै क्षेत्रबाट पनि चुनाव लड्न सक्ने तर्क गर्दै जोशीले निर्विवाद भएर पार्टीका हितमा निर्णय गर्न सुझाव दिए । ‘उहाँले सबैलाई चित्त बुझाएर आफूले ठाउँ रोज्नुपर्ने हो,'उनले भने ।
नेता जोशी केही समययता पार्टीको तर्फबाट टिकट पाउनका लागि दबाबमूलक कार्यक्रमका साथ जिल्ला तथा राजधानीमा सक्रिय छन् । तर सोही क्षेत्रबाट टिकटका लागि वरिष्ठ नेता पौडेलसँगै अर्का केन्द्रीय सदस्य शंकर भण्डारी र गोविन्द भट्टराईबीचको प्रतिष्पर्धालाई जोशीले सामना गरिरहेका छन् ।
प्रतिक्रिया दिनुहोस !
