कांग्रेस उम्मेदवार सोमबारसम्म

काठमाडौं : कांग्रेसले दोस्रो चरणमा ४५ जिल्लामा हुने प्रतिनिधिसभा र प्रदेशसभा निर्वाचनका लागि सोमबारसम्म उम्मेदवार तय गर्र्ने भएको छ । संसदीय समितिको बुधबार बसेको बैठकले सोमबारसम्म उम्मेदवार तय गर्ने सहमति गरेको हो ।

आफ्ना उम्मेदवार छान्नुअघि कांग्रेसले लोकतान्त्रिक गठबन्धनमा आबद्ध संघीय समाजवादी फोरम नेपाल, राजपा नेपाल, राप्रपा र राप्रपा (प्रजातान्त्रिक) सँग बिहीबार छुट्टाछुट्टै वार्ता गर्ने भएको छ । कांग्रेसले गठबन्धनमा सहभागी चार दलसँग सिट तालमेल र चुनावी मुद्दाबारे बिहीबार टुंगो लगाउने जनाएको छ । संसदीय समितिको बैठकमा सभापति शेरबहादुर देउवाले पहिलो चरण निर्वाचन हुने ३२ जिल्लामा बागी उम्मेदवारी दिनेविरुद्ध कडा निर्णय लिने चेतावनी दिएका थिए ।

बैठकमा १६५ स्थानमध्ये कांग्रेस एक्लैले ४५ देखि ५५ सिट र गठबन्धनमा रहने दलको इमानदारीमा ७५ सिटसम्म जित्नसक्ने विषयमा छलफल भएको एक सहभागीले जानकारी दिए । प्रतिनिधिसभातर्फ २८ सिट रहेको प्रदेश १ मा ठिकै, ३२ सिट रहेको प्रदेश २ मा अति राम्रो, ३३ सिट रहेको प्रदेश ३ मा सन्तोषजनक, १८ सिट रहेको प्रदेश ४ मा प्रतिस्पर्धात्मक, २६ सिट रहेको प्रदेश ५ मा राम्रो, १२ सिट रहेको प्रदेश ६ मा तीव्र प्रतिस्पर्धा र १६ सिट रहेको प्रदेश ७ मा अति राम्रो अवस्था रहेको कांग्रेसले विश्लेषण गरेको छ ।

उम्मेदवार छान्नुअघि कांग्रेसले लोकतान्त्रिक गठबन्धनमा आबद्ध फोरम नेपाल, राजपा र दुवै राप्रपासँग बिहीबार छुट्टाछुट्टै वार्ता गर्ने ।

समिति बैठक गठबन्धनको एकता र चुनावी तालमेलमै केन्द्रित रहेको नेता अर्जुननरसिंह केसीले जानकारी दिए । गठबन्धनसँगको गम्भीर वार्तालाई पूर्णता दिँदै सोमबारसम्म निर्णयमा पुग्ने उनले बताए । अर्का नेता रमेश रिजालले बिहीबार ८ बजे दुवै राप्रपासँग छलफल, त्यसपछि पुनः समितिको बैठक, त्यसपछि फोरम नेपाल र राजपासँगको बैठक हुने बताए । ‘दोस्रो संविधानसभा र स्थानीय तह निर्वाचनमा कहाँ, कसले, के-कति स्थान पाए, त्यसैका आधारमा लोकतान्त्रिक गठबन्धनको सिट तालमेल हुन्छ', उनले भने ।

प्रदेश २ मा कांग्रेस एक्लैले प्रतिनिधिसभातर्फ ३२ मध्ये २० स्थानमा चुनाव जित्ने भएकाले त्यसमा प्रदेशसभातर्फ फोरम नेपाल र राजपालाई बढी सिट दिने पक्षमा रहेको उनको भनाइ छ । पहाडमा ३७ मध्ये १५ सिटसम्म जित्ने आकलन गरिएको डा. प्रकाशशरण महतले बताए । निर्वाचनको तयारीका लागि बालकृष्ण खाँडको संयोजकत्वमा केन्द्रीय प्रचारप्रसार समिति गठन गरेको छ । महेश आचार्य नेतृत्वको घोषणापत्र तयारी समितिले तयार गरेको घोषणापत्रको खाकामा आवश्यक सुझाव समेटी अन्तिम रूप दिइएकाले शनिबारसम्म सार्वजनिक हुने भएको छ ।

फोरम नेपालका सहअध्यक्ष राजेन्द्र श्रेष्ठले लोकतान्त्रिक गठबन्धनमा फोरम नेपाल र राजपाले करिब ५० सिट माग गरेको बताए । उनले भने, ‘१६५ मा ५० सिट आफूहरूलाई, दिएपछि कांग्रेसले अन्य दललाई केही सिट दिँदै करिब सय सिटमा उम्मेदवारी दिन सक्छ । यद्यपि, यो विषयले निकास पाउन अझै केही दिन लाग्छ ।' तालमेलकै विषयमा कांग्रेस नेता विमलेन्द्र निधिले बुधबार राजपाका अध्यक्ष महन्थ ठाकुर र सर्वेन्द्रनाथ शुक्लासँग वार्ता गरेको स्रोतले बताएको छ ।