काठमाडौं : ४५ जिल्लामा मंसिर २१ गते हुने प्रतिनिधिसभा तथा प्रदेशसभा निर्वाचनका लागि बिहीबार मुख्य निर्वाचन अधिकृतको कार्यालय स्थापना भएका छन् । निर्वाचन आयोगका प्रवक्ता नवराज ढकालका अनुसार ४५ जिल्लामै निर्वाचन अधिकृतको कार्यालय स्थापना भएका छन् ।
दोस्रो चरणमा प्रतिनिधिसभातर्फ १ सय २८ र प्रदेशसभातर्फ २ सय ५६ निर्वाचन क्षेत्रमा निर्वाचन हुँदै छ । दोस्रो चरणमा निर्वाचन हुने ४५ जिल्लामा प्रदेश नम्बर १ का इलाम, तेह्रथुम, धनकुटा, उदयपुर, झापा, मोरङ र सुनसरी, प्रदेश नम्बर २ का सप्तरी, सिरहा, धनुषा, महोत्तरी, सर्लाही, बारा, पर्सा र रौतहट, प्रदेश नम्बर ३ का सिन्धुली, मकवानपुर, चितवन, काभ्रेपलाञ्चोक, काठमाडौं, ललितपुर र भक्तपुर छन् ।
प्रदेश नम्बर ४ का तनहुँ, कास्की, स्याङ्जा, पर्वत र नवलपरासी (बर्दघाट सुस्ता पूर्व), प्रदेश नम्बर ५ का पाल्पा, अर्घाखाँची, गुल्मी, रुपन्देही, कपिलवस्तु, दाङ, प्युठान, बाँके, बर्दिया र नवलपरासी (बर्दघाट सुस्ता पश्चिम), प्रदेश नम्बर ६ का सल्यान, सुर्खेत र दैलेख तथा प्रदेश नम्बर ७ का कैलाली, कन्चनपुर, डडेलधुरा, अछाम र डोटीमा निर्वाचन हुँदै छ ।
दोस्रो चरणमा १ करोड २१ लाख ९८ हजार ८ सय ५२ मतदाताले मताधिकार प्रयोग गर्नेछन् । दोस्रो चरणको निर्वाचनका लागि कात्तिक १६ गते उम्मेदवारको मनोनयन दर्ता हुनेछ ।
प्रतिक्रिया दिनुहोस !
