लोकतान्त्रिक गठवन्धनलाई बागी उम्मेदवारकै तनाव

नुवाकोट :  मंसिर १० गते तय भएको प्रदेशसभा तथा संघीय निर्वाचनका लागि नुवाकोटमा लोकतान्त्रिक पक्षधरलाई बागी उम्मेदवारकै तनाव परेको छ । आफ्ना सक्रिय कार्यकर्ताले बागी उम्मेदवारी दिएको र फिर्ता नलिएपछि आफ्नो पक्षको मत काटिने डरले लोकतान्त्रिक पक्षधर दलहरु तनावमा परेका हुन्।
पछिल्लो समय नेपाली काँग्रेसमा परिवारवाद हावी भएको जनाउँदै कांग्रेस आवद्ध कार्यकर्ता बढी निराश देखिएका छन् । परिवारवादको अन्त्य नभएसम्म काँग्रेस नुवाकोटमा बलियो नहुने कांग्रेसका पुराना कार्यकर्ता बताउँछन् ।

 

पार्टीमा लामो समय त्याग गरेका नेता तथा कार्यकर्ताको पार्टीभित्रै मूल्याङ्कन हुन छाडेको कार्यकर्ताहरुको बुझाई छ । यस पटकको निर्वाचनमा नेपाली कांग्रेसका केन्द्रीय सदस्य तथा पुर्वमन्त्री अर्जुननरसिंह केसी र उहाँका भाई तथा निवर्तमान सांसद एवं कांग्रेस नुवाकोटका सभापति जगदीश्वरनरसिंह केसी नुवाकोट क्षेत्र नं. १ बाट क्रमशः प्रतिनिसभा र प्रदेशसभा १ का उम्मेदवार छन् ।

एउटै क्षेत्रबाट केसीद्वयका मात्र होइन, क्षेत्र नं. १ मा डा.रामशरण महत र उनका भतिज रमेशकुमार महत पनि चुनावी मैदानमा उत्रिएका छन् । यसका कारण कतिपय कार्यकर्ता नेपाली कांग्रेस सिंगो पार्टी नै परिवारवाद र नातावादतर्फ उन्मुख भएको बताउन थालेका छन् । नुवाकोटको पूर्वी भेगमा रहेको बेलकोटगढी नगरपालिका वडा नं. १२ का बद्रीप्रसाद त्रिपाठी लामो समयदेखि नेपाली कांग्रेसको राजनीतिमा संलग्न रहेपनि यस पटक त्रिपाठीले आफ्नो पार्टीप्रति त्याग र मेहनतलाई मूल्यांकन गर्न नसकेको दाबी गर्दै प्रतिनिधिसभा क्षेत्र नं. २ को प्रदेश क मा आफ्नो स्वतन्त्र उम्मेदवारी दिएका छन्।

नेपाली कांग्रेस जिल्ला कार्यसमिति नुवाकोटमा दुई पटकसम्म काम गरेका त्रिपाठीलगायतका धेरै कार्यकर्ता पार्टी नीति, सिद्धान्त र विधान अनुसार सञ्चालन नभएको बताउँछन् । साविकको मदानपुर गाविसका गाउँ इकाई सभापतिसमेत रहेका त्रिपाठीले स्थानीय तहको निर्वाचनमा बेलकोटगढी नगरपालिकाबाट मेयर पदमा दावी गरेका थिए ।

गत वैशाख ३१ गतेको स्थानीय तहको निर्वाचनमा पार्टीले उनलाई टिकट दिएन । स्थानीय तहमा बसेर नेपाली कांग्रेसका लागि अहोरात्र खट्ने नेता तथा कार्यकर्ताको मूल्याङ्कन हुन नसकेको उनको दुखेसो रहेको छ । नेपाली काँग्रेसमा रहेर केन्द्रमा राजनीति गर्नेहरुको वरिपरी घुम्ने, पैसाको पहुँच भएका र अन्य पार्टीबाट आएकाहरुले स्थान जमाउँदै जाँदा पार्टीको संरचना नै ध्वस्त हुने अवस्थामा आइपुगेको त्रिपाठीको भनाई छ । त्रिपाठीले जिल्ला सभापति जगदीश्वरनरसिंह केसीले कांग्रेसको संगठन बनाउनुको साटो भत्काउने काम गरेको र इमान्दारलाई पाखा लगाउने काम गरेको भन्दै आफूले उम्मेदवारी दिएको बताए ।

उनले जनमत आफ्नो पक्षमा रहेको भन्दै उम्मेदवारी फिर्ता नलिई अन्तिमसम्म चुनावी कार्यक्रम र मतदाताको माँझमा पुग्ने बताए । उम्मेदवारी फिर्ता गराउनका लागि धेरै दवाव आएपनि आफूले फिर्ता नगरेको बताउँदै त्रिपाठीले आफू नेपाली कांग्रेसको कार्यकर्ता भएको र केसी वा महत कसैको दास नभएको प्रतिक्रिया दिए।

पार्टीभित्रको परिवारवाद, नातावाद, धनीमानी, पैसावालालाई काखी च्याप्ने र आफू अनुकुलका व्यक्तिहरु हावी हुने परिपाटीको अन्त्य गर्नका लागि प्रदेशसभाको निर्वाचनमा उम्मेदवारी दिएको बताए। नेपाली कांग्रेसमा लागेर लामो समय बिताएका, निष्ठाको राजनीति गर्ने र दुःखको बेला पार्टीको अस्तित्व बचाउनेहरु पार्टीमा निर्धक्कसाथ अघि बढ्ने सम्भावना नदेखेपनि आफूले प्रदेशसभामा उम्मेदवारी दिएको त्रिपाठीले बताए ।

आफ्नो उम्मेदवारी कसैलाई सिध्याउनका लागि नभई स्वतन्त्र रुपमा आफ्नो उम्मेदवारी दिएको उनको भनाई छ। काँग्रेसभित्र धेरै कार्यकर्ताहरु अहिले पनि थिचोमिचो र दुःख झेलिरहेकाहरुलाई आफूलाई विश्वास गरेर जीप चिन्हमा मतदाता गर्ने अपेक्षा उनले गरेका छन् ।