‘सार्क शिखर सम्मेलन चाँड गरौं'
काठमाडौं : नेपालका लागि पाकिस्तानी राजदूत मजहर जावेदले दक्षिण एसियाली क्षेत्रीय सहयोग संगठन (सार्क) को १९ औं शिखर सम्मेलन चाँडै आयोजना हुनुपर्ने बताएका छन् ।पाकिस्तानी दूतावासले शुक्रबार राजधानीमा आयोजना गरेको ‘जम्मु र कस्मिर विवादको समाधान : क्षेत्रीय शान्ति र विकासका लागि आवश्यकता' विषयक प्रवचन कार्यक्रममा राजदूत जावेदले सार्क शिखर सम्मेलन आयोजना गर्न आफ्नो मुलुक प्रतिबद्ध रहेको बताए ।
भारत र पाकिस्तानबीचको मनमुटावले सार्क गतिहीन बनेको र यसको अस्तित्व नै संकटमा परेको विश्लेषण सार्क क्षेत्रमा भइरहेका बेला पाकिस्तानी राजदूतको यो भनाइ आएको हो । नेपाल सार्कको वर्तमान अध्यक्ष मुलुक हो । पाकिस्तानले नेपाललाई सार्क शिखर सम्मेलन आयोजनाका लागि अध्यक्षका नाताले पहल गरिदिनसमेत आग्रह गर्दै छ ।
भारतलगायत चार मुलुकले सन् २०१६ नोभेम्बर पहिलो साताका लागि पाकिस्तानमा निर्धारित १९ औँ सार्क शिखर सम्मेलन बहिष्कार गर्ने निर्णय गरेपछि शिखर सम्मेलन आयोजना हुन सकेको छैन । भारत, अफगानिस्तान, बंगलादेश र भुटानले पाकिस्तानले आतंकवादलाई प्र श्रय दिएको आरोप लगाउँदै इस्लामावादमा निर्धारित सार्क शिखर सम्मेलन बहिष्कार गरेका थिए । पाकिस्तानले आफू माथिका आरोपको खण्डन गर्दै सार्क शिखर सम्मेलन गर्न प्रतिबद्ध रहेको बताएको थियो । त्यसयता सार्क शिखर सम्मेलन आयोजना गर्नेबारे सदस्य मुलुकबीच छलफल चले पनि ठोस प्रगति हुन सकेको छैन ।
कार्यक्रममा राजदूत जावेदले राष्ट्रसंघीय सुरक्षा परिषद्ले पारित गरेको प्रस्तावअनुसार कस्मिर विवादको समाधान हुनुपर्ने र भारतले जारी राखेको मानवअधिकार उल्लंघन बन्द हुनुपर्ने बताए । कार्यक्रममा पूर्वराजदूत डा. विष्णुहरि नेपाल, पत्रकारद्वय सीताराम भट्टराई र राजन कार्कीले कस्मिर विवादको शान्तिपूर्ण समाधान हुनुपर्नेमा जोड दिए ।