विर्तामोड घटना छानबिन गर्न सरकारी टोली झापा आउँदै, बिर्तामोडमा कर्फ्यु जारी
विर्तामोडः शुक्रबार बिर्तामोडमा एक जनाको ज्यान जाने गरी भएको घटनाका बारेमा छानबिन गर्न सरकारले गठन गरेको ४ सदस्यीय उच्चस्तरीय टोली शनिबार झापा आउँदैछ ।
गृह मन्त्रालयका सहसचिब बिरेन्द्रकुमार यादबको संयोजकत्वमा नेपाल प्रहरीका नायब महानिरीक्षक रमेशकुमार भट्टराई, सशस्त्र प्रहरीका नायब महानिरीक्षक चिरञ्जीवी अधिकारी र राष्ट्रिय अनुसन्धान बिभागका अनुसन्धान निर्देशक हरिहर पौड्ेल सम्मिलित टोली शनिबार झापा आउने गृह मन्त्रालयले बिज्ञप्ति मार्फत जानकारी गराएको छ ।
टोलीले ७ दिन भित्रमा शुक्रबारको घटनाका बारेमा छानबिन गरी भविष्यमा यस्ता घटना हुन नदिन अपनाउनु पर्ने सुरक्षा सर्तकताका बारेमा समेत उल्लेख गरि प्रतिवेदन बुझाउने गृह मन्त्रालयले जानकारी दिएको छ ।
बिर्तामोडमा शुक्रबार दिउँसो १ः३० बजे जारी भएको कफर्यु अहिले पनि जारी रहेको जिल्ला प्रहरी कार्यालय झापाका प्रमुख प्रहरी उपरीक्षक विष्णु केसीले जानकारी दिए । स्थानीय प्रशासन ऐन अनुसार कफर्युको समयलाई ब्यवस्थापन गर्न बिर्तामोड बजार क्षेत्रमा सेना समेत परिचालन गरिएको छ ।
अर्जुनधारा नगरपालिका वडा नं. ११ का ११ वर्षीय लक्ष्मण शिवाकोटीको असोज १४ गते भएको शंकास्पद मृत्युको सत्यतथ्य छानबिन र दोषीलाई कारबाहीको माग गर्दै प्रदर्शनमा उत्रेका मृतक बालकका आफन्त र स्थानीयबासी र प्रहरीबीच बिर्तामोडमा झडप हुँदा प्रहरीको गोली लागि शुक्रबार अर्जुनधारा ५ का नरेश थापाको मृत्यु भएका थियो भने दर्जनौ घाइते भएका छन् ।
प्रतिक्रिया दिनुहोस !
