किर्गिस्तानसँग हार्यो नेपाल
काठमाडौं : छनोट चरण पार गर्ने लक्ष्यसहित एएफसी यू-१९ छनोट च्याम्पियनसिपमा सहभागी भएको नेपाली युवा फुटबल टोलीलाई आफ्नो पहिलो खेलमै घरेलु टोली किर्गिस्तानको धक्का लागेको छ । समूह ‘ए’ अन्तर्गतको आफ्नो पहिलो खेलमा नेपाल आयोजक किर्गिस्तानसँग २-० गोलले पराजित भयो । किर्गिस्तानको बिस्केकमा मंगलबार भएको खेलमा नेपालले २१औं मिनेटमा पहिलो गोल खाएको थियो ।
किर्गिस्तानका लागि बोरुबेबे गुल्जिगिटले गोल गर्दै घरेलु टोलीको उत्साह बढाएका थिए । नेपालले पहिलो हाफमा केही फितला मौका पाए पनि त्यसलाई सदुपयोग गर्न सकेन । पहिलो हाफको तुलनामा दोस्रो हाफमा केही सुधारिएको प्रदर्शन गरेको नेपालले ६०औं मिनेटमा बराबरी गोल फर्काउने मौका गुमाएको थियो । किर्गिस्तानका गोलरक्षक विट भएको अवस्थामा रोजिन सुब्बा गोल गर्नबाट चुकेका थिए ।
नेपालको तुलनामा बलियो देखिएको घरेलु टोलीले दोस्रो हाफको इन्जुरी समयमा अर्को गोल थपेपछि नेपाल हार खेप्न बाध्य बन्यो । किर्गिस्तानका लागि दोस्रो गोल शुकुरोभ अलिमार्डोनले गरेका थिए । आफू समान टोली किर्गिस्तानसँगको हारले नेपाललाई अघिल्लो चरणमा पुग्न धेरै मिहिनेत गर्नुपर्ने देखिएको छ । नेपालले यसअघि उमेर समूहका अन्तर्राष्ट्रिय स्पर्धामा उत्कृष्ट ननिजा निकाल्दै आएको थियो ।
नेपालले एक महिनाअघि भुटानमा सम्पन्न यू-१८ साफ च्याम्पियनसिपको फाइनलमा भारतलाई हराएर उपाधि जितेको थियो । टोलीमा अहिले पनि साफ च्याम्पियनसिप खेलेकै खेलाडीको वर्चस्व रहेको छ । नेपाल सम्मिलत समूह ‘ए’ मा आयोजक किर्गिस्तानसँगै बहराइन, यूएई र ओमन छन् । यूएई र ओमन नेपालभन्दा धेरै बलिया मानिन्छन् । समूहको दोस्रो खेल नेपालले बिहीबार बहराइनसँग खेल्नेछ । यसैगरी तेस्रो खेल कात्तिक १८ गते यूएई र अन्तिम खेल कात्तिक २२ ओमानसँग खेल्नेछ ।