कुमाल बस्तीमा छैन निर्वाचनको रौनक
इनारपाटी (नुवाकोट) : जताततै निर्वाचनको माहोल भए पनि नुवाकोटका कुमाल समुदायलाई भने चुनावी सरगर्मीले छुन सकेको छैन । नेताहरूले आफूहरूलाई निर्वाचनका बेला ‘भोट बैंक'का रूपमा मात्र लिने गरेको उनीहरूको गुनासो छ ।
विदुर नगरपालिकाका वडा नम्बर ४, ५ र ६ मा रहेका कुमालहरू दलहरूले भोट बैंकमा सीमित गर्दा पिछडिनुपरेको बताउँछन् । राज्यको प्रशासनिक निकायमा कमजोर सहभागिता रहेको कुमाल समुदाय कला, संस्कृति र पहिचानका हिसाबमा भने धनी जाति मानिन्छन् । आफ्नै भाषा तथा मौलिकतामा रम्दै आएका कुमाल समुदायको पुख्र्यौली पेसा माटाबाट विभिन्न सामग्री बनाउनु हो ।
अहिले कालो माटो पाइन छाडेका कारण पेसालाई निरन्तरता दिन समस्या परिरहेको उनीहरूको भनाइ छ । पीपलटार, माझीटार, ठूलागाउँ, एनारपाटी, महारानीहिडीका कुमाल समुदाय गरिबीले गर्दा निर्वाचनमा केन्द्रित हुन नसकेको अगुवा जुजुलाल कुमालको भनाइ छ ।
‘निर्वाचनका समयमा नेताहरू उम्मेदवारसहित भोट माग्न आउँछन् । हाम्रा माग सुन्छन् तर वाचा पूरा गर्दैनन्', विदुर-४ का रूपलाल कुमालले भने ।
गरिबीले गर्दा साँझ-बिहान चुलोमा आगो बाल्नु नै पहिलो काम हुने अर्का युवा रामशरण कुमालले बताए । निर्वाचनप्रति चासो घटेको उनको भनाइ छ ।
‘ऋण छ, कसैले पनि तिरिदिँदैनन्', इनारपाटीकी लक्ष्मी कुमालले भनिन्, ‘त्यही भएर निर्वाचनले हामीलाई छुन नसकेको हो ।' एक सय पाँच घर कुमालले गाउँमा सिँचाइको व्यवस्थाका साथै उद्योग स्थापना गरिदिन माग गरेका छन् ।
नुवाकोटका १२ वटै तहमा निर्वाचनको सरगर्मी बढे पनि कुमाल बस्तीमा भने उत्साह देखिँदैन । कुमाल बस्तीका अधिकांश पुरुष जाल बोकेर त्रिशूली र तादी नदीमा माछा मार्न जान्छन् । त्यही माछा बजार पुर्याएर बिक्री गर्छन् । विगतका निर्वाचनमा गाउँमा सिँचाइ ल्याउने, इनार खनिदिने, बाटोघाटो, पुलपुलेसा बनाइदिने आश्वासनपछि अगुवाले भनेकै व्यक्तिलाई भोट हाले । तर, जितेर गएपछि कोही नेता फर्केर गएनन् । अहिलेचाहिँ पहिले काम गरिदिनेलाई मात्र भोट हाल्ने सोचमा रहेछन् उनीहरू ।
‘निर्वाचनमा मात्र आउने, त्यसपछि मुख नदेखाउने नेतालाई भोट हाल्दैनौं', पीपलटारका वीरमान कुमालले भने ।
जनप्रतिनिधि भएका कुमाल
दलहरूले कुमाल समुदायको मत लिनका लागि स्थानीय तह निर्वाचनमा प्रतिनिधिमूलक उम्मेदवार उठाएका थिए । केहीले विजय पनि प्राप्त गरे । एमालेले विदुर वडा नम्बर ५ मा शिवबहादुर कुमाल र वडा नम्बर ६ मा मानबहादुर कुमाललाई सदस्य पदमा उम्मेदवार बनाएको थियो । दुवै जना विजयी भए । उनीहरूले अहिले जनप्रतिनिधि भई काम गरिरहेका छन् ।