सेनालाई तेक्वान्दो उपाधि
विदुर : नेपाल इन्टरनेसनल तेक्वान्दो महासंघ जिल्ला कार्यसमिति नुवाकोटको आयोजनामा भएको १७औं सिनियर तथा १०औं जुनियर राष्ट्रिय आईटीएफ तेक्वान्दो प्रतियोगिताको उपाधि नेपाली सेनाले जितेको छ । शनिबार भएको अन्तिम प्रतिस्पर्धामा नेपाली सेनाले प्रतियोगिताको सिनियरतर्फको उपाधि उचालेको हो ।
प्रतियोगितामा सेनाले नौ स्वर्ण, १० रजत र १७ कांस्य पदकसहित उपाधि उचाल्न सफल भयो । प्रतियोगितामा जुनियरतर्फको उपाधि मध्यमाञ्चल विकास क्षेत्रले जित्न सफल भयो । प्रतियोगितामा जुनियरतर्फ मध्यमाञ्चलले पाँच स्वर्ण, ६ रजत र तीन कांस्य पदक जित्यो ।
प्रतियोगिताको उत्कृष्ट खेलाडीको उपाधि सिनियर महिलातर्फको उपाधि मध्यमाञ्चलकी रन्जु पुलामीमगर र जुनियर महिलातर्फ मध्यमाञ्चलकै विपना थापामगरले जितिन् । यसैगरी सिनियर पुरुषतर्फ मध्यमाञ्चलका सागर कुँवर र जुनियर पुरुषतर्फ मध्यमाञ्चलकै युनिश गौतम उत्कृष्ट चुनिए । उत्कृष्ट भएका चारै जनाले जनही दुई हजार पाँच सय रुपैयाँका साथै ट्रफी, मेडल र प्रमाणपत्र हात पारे । प्रतियोगिताका विजेतालाई स्थानीय भरत खड्काले पुरस्कृत गरे ।
प्रतियोगिता विदुर नगरपालिका-२ मा रहेको खेलकुद कभर्डमा सञ्चालन भएको थियो । प्रतियोगितामा पाँच विकास क्षेत्र, नेपाली सेना, सशस्त्र प्रहरी र आयोजक गरी ६ टोलीका एक सय महिलासहित दुई सय जना खेलाडीले विभिन्न तौल समूहमा प्रतिस्पर्धा गरेको प्रतियोगिता संयोजक वासु भट्टले जानकारी दिए । प्रतियोगितामा पुरुषतर्फ २० देखि ८५ केजी तौल समूह र महिलातार्फ २५ देखि ७५ केजी तौल समूहमा प्रतिस्पर्धा भएको थियो ।
प्रतियोगितामा ४१ स्वर्ण, ४१ रजत र ८२ कांस्य गरी एक सय ६४ पदकका लागि खेलाडीले प्रतिस्पर्धा गरेका थिए ।