अविवाहित रोनाल्डोको चौथो सन्तान
म्याड्रिड : अविवाहित पोर्चुगिज फुटबल स्टार रोनाल्डो चौथो सन्तानको पिता बनेका छन् । रोनाल्डोकी प्रेमिका जियोर्जिना रोड्रिगेजले आइतबार राति छोरी अलना मार्टिनालाई जन्म दिएकी हुन् । रोनाल्डोको यसअघि नै तीन सन्तान छन् । यद्यपि रोनाल्डोकी प्रेमिकाबाट जन्मिएको भने अलना पहिलो सन्तान हुन् । यसअघिका तीनजना सन्तान सेरोगेसी मदरबाट जन्मिएका हुन् ।
आफ्नो चौथो सन्तान जन्मिएको समाचार रोनाल्डो आफैंले सार्वजनिक गरेका हुन् । रोनाल्डोले जेठो छोरो रोनाल्डो जुनियरसहित प्रेमिका रोड्रिगेजसँग अस्पतालको शय्यामा खिचाएको तस्बिर सामाजिक सञ्जालमा राख्दै आफ्नो चौथो सन्तानको रूपमा छोरी अलना जन्मिएको समाचार सार्वजनिक गरेका हुन् । रोड्रिगेजले म्याड्रिडकै एक अस्पतालमा छोरी अलनालाई जन्म दिएकी हुन् ।
रोड्रिगेज आइतबार बिहान अस्पताल भर्ना भएको समाचारमा जनाइएको छ । स्पेनिस सञ्चारमाध्यमले जनाएअनुसार अस्पतालले दिएको भन्दा नौ दिनअघि नै रोड्रिगेजले छोरीलाई जन्म दिएकी हुन् । सामाजिक सञ्जालमा राखिएको तस्बिरमा रोनाल्डो निकै हर्षित मुद्रामा देखिएका छन् । हालै भएको एक सार्वजनिक कार्यक्रममा रोनाल्डोले पिता बन्नु एकदमै फरक अनुभव भएको बताएका थिए ।
‘पिता बन्नु फरक यात्रा र अनौठो अनुभव हो’, आफ्नो ब्रान्डको कपडा सार्वजनिक गर्ने कार्यक्रममा रोनाल्डोले भनेका थिए, ‘जुन यात्राले मलाई पूर्ण रूपमा परिवर्तन गरिदिएको छ । यसले अहिलेसम्म अस्तित्वमा नरहेको मायाको अनुभव पनि गराएको छ ।’ उनले पिता बनेपछि आफूले जीवनका महत्वपूर्ण पक्षहरूको बारेमा पनि फरक अनुभव गरेको बताएका छन् । यसअघि सेरोगेसी मदरबाट रोनाल्डोको जुम्ल्याहा छोराछोरी इभा मारिया र माटिया जन्मिएका थिए । त्यसअघि रोनाल्डोको जेठा छोरा पनि सेरोगेसी मदरबाटै जन्मिएका थिए ।