विप्लवका तीन कार्यकर्ता पक्राउ

जुम्ला :  आसन्न प्रतिनिधि सभा र प्रदेश सभा निर्वाचनको समय नजिकिँदै गर्दा निर्वाचनको गतिविधि बिथोल्ने आशंकामा जुम्लामा नेकपा विप्लव समूहका दुई जना कार्यकर्ता पक्राउ परेका छन् । शुक्रबार दिउँसो जिल्लाको हिमा गाउँपालिकाको ब्रुह प्रहरी चौकीले विप्लव समूहका दुई जना कार्यकर्तालाई निर्वाचन बिथोल्न नदिनका लागि पक्राउ गरिएको बताएको छ ।

नेकपाका जिल्ला सदस्य हिमा गाउँपालिका ७ निवासी हैत बुढा र सोही गाउँपालिका ५ निवासी कुलबहादुर शाहीलाई पक्राउ गरी जिल्ला प्रहरी कार्यालय खलंगामा ल्याइएको प्रहरी सहायक निरीक्षक चुडामणि पुनले जानकारी दिए । यसअघि कात्तिक २९ गते सिंजा गाउँपालिका-२ को रनुखानामा मतदाता शिक्षा सामग्री लुटिएको थियो । यस्तै, कालिकोटमा पनि शुक्रबार विप्लव समूहका एक जना कार्यकर्तालाई प्रहरीले पक्राउ गरेको जनाएको छ ।

रोपनी जनजागृति प्रावि मतदान केन्द्रका मतदाताको लागि लिँदै गरेको मतदाता शिक्षा सामग्री विप्लव समूहका कार्यकर्ताले लुटेको बताइएको छ । मतदाता शिक्षा स्वयंसेवक जयशंकर चौँलागाई र राधा श्रेष्ठले मतदातालाई मतदानसम्बन्धी जानकारी गराउन जाने क्रममा बीच बटोमा सामग्री लुटिएको उनीहरुले बताएका छन् । मंसिर १० गते हुने प्रदेश सभा र प्रतिनिधि सभाको निर्वाचनका लागि जिल्लाका प्रत्येक मतदान केन्द्रमा मतदाता शिक्षा स्वयंसेवक परिचालन गरिएको छ । निर्वाचन सामग्री लुटिएपछि विप्लव समूहका कार्यकर्ताले सामाजिक सञ्जालमा समेत पोष्ट गरेका थिए ।

शुक्रबार नै कालिकोट नरहरीनाथ गाउँपालिका ४ को गाठीमा मतदाता शिक्षा सामग्री लुटिएको छ । गोठी मतदान केन्द्रका मतदाताको लागि लैजाँदै गरेका मतदाता शिक्षा सामग्री विप्लव समूहका कार्यकर्ताले लुटेको जिल्ला प्रहरी कार्यालय कालिकोटले जनाएको छ । निर्वाचन बिथोल्ने कार्यमा संलग्नलाई खोजी गरिरहेको समेत प्रहरीको भनाइ छ । निर्वाचन शिक्षा सामग्री लुटिएपछि काम गर्न असहज भएको समेत कार्यालयले जनाएको छ । कालिकोटका निर्वाचन प्रमुख मणिराम भट्टराईले अज्ञात समूहले लुटेको ठाउँमा थप निर्वाचन शिक्षा सामग्री पठाउन लागिएको बताए । निर्वाचन शिक्षाका लागि बनाइएका पोष्टर, नमूना मतपत्र लगायका सामग्री च्यातिएको छ ।

यता जिल्ला प्रशासनले भने मतदाता शिक्षा सामग्री लुट्नेहरुको समेत खोजी भइहेको जनाएको छ । हाल पक्राउ परेको सोही समूहका हुनसक्ने आशंक गरिएको प्रमुख जिल्ला अधिकारी विष्णु पौडेलले बताए । निर्वाचन विरोधी गतिविधि हुन सक्ने भन्दै दुबै जनालाई निर्वाचन सकिन्जेलसम्म प्रहरी नियन्त्रणमा राखिने जिल्ला प्रहरी कार्यालय जुम्लाले जनाएको छ । जुम्लामा विप्लव नेतृत्वका पार्टी नेताकार्यकर्ताले निर्वाचन बिथोल्न कुनै अप्रिय काम नगरेपनि पूर्व सजकता बनाउनको लागि अनुसन्धानकै क्रममा दुई जनालाई प्रक्राउ गरिएको हो ।