अफगानिस्तानले जित्यो यू-१९ एसिया कप

काठमाडौं : एसियाली क्रिकेट काउन्सिल (एसीसी) यू-१९ युथ एसिया कप क्रिकेट प्रतियोगिताको उपाधि अफगानिस्तानले जितेको छ । आइतबार मलेसियाको क्वालालम्पुरमा भएको फाइनल खेलमा पाकिस्तानलाई एक सय ८५ रनको फराकिलोअन्तरले पराजित गर्दै अफगानिस्तानले पहिलो पटक यू-१९ एसिया कपको उपाधि जितेको हो । टस हारेर पहिले ब्याटिङको निम्तो पाएको अफगानिस्तानको युवा टोलीले निर्धारित ५० ओभरमा सात विकेट गुमाएर दुई सय ४८ रन बनाएको थियो ।

अफगानिस्तानका लागि इक्रम फइजीले शतक बनाए । खेलको अन्तिमसम्म अविजित रहेका उनले एक सय सात रन जोडे । उनले एक सय १३ बलको सामना गरी दुई छक्का र १० वटा चौका प्रहार गरेका थिए । यसैगरी रहमान गुलले ४०, इब्राहिम जार्डनले ३६, डार्विस रसोलीले १८ र क्विस अहमदले १४ रन थपेका थिए । पाकिस्तानका बलर मोहम्मद मुसाले तीन विकेट लिए । साहिन साह अफ्रिदीले दुई तथा हसन खान र मोहमद ताहाले एक÷एक विकेट हात पारे ।

दुई सय ४९ रनको लक्ष्य पछ्याएको पाकिस्तान २२.१ ओभरमा केवल ६३ रन बनाउँदै अलआउट भयो । पाकिस्तानलाई कम योगफलमा समेट्न अफगानिस्तानका बलर मुजिवउमर रहमानले पाँच विकेट लिए । रहमानले नेपालविरुद्धको सेमिफाइनलमा पनि ६ विकेट लिएका थिए । पाकिस्तानका लागि मोहम्मद ताहाले सर्वाधिक १९ रन जोडेका थिए ।

यसैगरी कप्तान हसन खानले १० रन बनाएका थिए भने अन्य ब्याट्सम्यानले दोहोरो संख्यामा रन बटुल्न सकेनन् । अफगानिस्तानले सेमिफाइनलमा नेपाललाई पराजित गर्दै फाइनलमा स्थान बनाएको थियो । पाकिस्तान भने बंगलादेशलाई पाखा लगाउँदै फाइनलमा पुगेको थियो ।