काठमाडौं- ५ मा त्रिपक्षीय प्रतिस्पर्धा

काठमाडौं: काठमाडौं-५ मा कांग्रेस, एमाले र विवेकशील साझा पार्टीका उम्मेदवार चुनाव जित्ने दाबीसहित मतदाताको घरदैलोमा व्यस्त छन् ।

कांग्रेस केन्द्रीय सदस्य डा. प्रकाशशरण महत, एमाले महासचिव ईश्वर पोखरेल र विवेकशील साझाका अध्यक्ष उज्ज्वल थापा यो क्षेत्रमा प्रतिस्पर्धामा छन्। तीनै दलका उम्मेदवार प्रभावशाली भएकाले मतदाता अन्योलमा देखिन्छन् ।

‘हाम्रो क्षेत्रका तीनै जना उम्मेदवार प्रभावशाली छन्,' हाँडीगाउँकी उमा कार्की भन्छिन्, ‘हामी विकास गर्ने र महिलाको मर्म बुझ्नेलाई भोट दिन्छौं ।' बूढानीलकण्ठका अर्जुन खड्काले सहज रूपले व्यवसाय गर्न दिने नेतालाई भोट दिने बताए ।

०७० र ०६४ सालको संविधानसभा चुनावमा जित हात पारेको कांग्रेस यसपटक पनि जित्नेमा ढुक्क छ । उम्मेदवार फेरिँदैमा मतदाताले कांग्रेसको साथ नछाड्ने डा. महतको दाबी छ । एमाले महासचिव ईश्वर पोखरेल दुई पटकसम्म यस क्षेत्रका जनताले कांग्रेसको कार्यशैली देखिसकेकाले आफूले जित्ने विश्वासमा छन् । विवेकशील साझाका उम्मेदवार उज्ज्वल थापा पनि क्षेत्र नम्बर ५ का मतदाता विवेकी भएकाले आफूलाई मतदान गर्ने दाबी गर्छन् ।

कांग्रेस उम्मेदवार डा. महतले यस क्षेत्रको आर्थिक, सामाजिक, सांस्कृतिक तथा पुराताŒिवक विकासको छुट्टै योजना बनाएको बताए । ‘यस क्षेत्रका युवाले रोजगारीका लागि विदेश तथा अन्य क्षेत्रमा भौंतारिन नपरोस् भनेर लागिपरेको छु', उनले भने । शिक्षा र स्वास्थ्य क्षेत्रमा पनि आवश्यकताअनुसार पूर्वाधार तयार गर्ने उनले बताए । ‘म लोकतान्त्रिक पद्धतिमा काम गर्ने मान्छे हुँ । अघिल्लो चुनावी आधार तथा मेरो इमानदारी र कटिबद्धतालाई बुझेर मतदाताले मलाई नै रोज्नेमा विश्वस्त छु,' उनले थपे ।

एमाले महासचिव पोखरेल मुलुकै पराजित भएका बेला आफूले चुनाव हारेको बताए । ‘देश नै हारेका बेला मैले पनि हारेको हुँ, त्यतिबेलाको र अहिलेको माहोल फरक छ । त्यसैले मैले जित्छु । म हारे पनि यहाँका जनतासँग निरन्तर सम्पर्कमा छु, यहीं समर्पित छु,' उनले भने, ‘जनताले यसपटक मलाई न्याय दिनेछन् ।'

आर्थिक एवं पूर्वाधार विकास, शिक्षा र स्वास्थ्यमा जनताको सहज पहुँचप्रति प्रतिबद्धता जनाउँदै उनले भने, ‘यस क्षेत्रमा २२ वटा स्वास्थ्य संस्था र तीन दर्जन शिक्षण संस्था छन् । यसलाई व्यवस्थित गरेर जनतासम्म पहुँच पुर्‍याउनेछु । यो क्षेत्र पूर्वप्रधानमन्त्री मनमोहन अधिकारीको क्षेत्र भएकाले पनि यसमा मेरो विशेष सामीप्य छ ।'

अमेरिकाबाट आइटी डिजाइनर पढेर नेपाल फर्केपछि युवा बटुलेर विवेकशील दल खोलेका उज्ज्वल थापा कुकुर चिह्न लिएर दोस्रो संविधानसभामा त्यसै क्षेत्रबाट उम्मेदवारी दिएका थिए । यो क्षेत्रमा उनको दोस्रो अनुभव हो । ‘काठमाडौं-५ लाई भीआईपी र बौद्धिक व्यक्तिहरूको सहर बनाउने मेरो योजना छ,' उनले भने, ‘सबै नेता आयातीत हुन् । मैले जति यो क्षेत्रलाई अरूले बुझेका छैनन् । म यहाँको हरेक वर्ग, समुदाय, धर्म/संस्कृति र विकासबारे परिचित छु । कस्तो विकास आवश्यक छ भन्ने कुरा मैले जति अरूले बुझ्न सक्दैनन् । यहाँको माटोले मलाई राम्ररी चिनेको छ ।'

निष्ठाको राजनीति बटुल्न चुनावमा होमिएको उनले बताए । भने, ‘माहोल बनाउन धेरै मान्छे चाहिँदैन एक जना नै काफी हुन्छ,' थापाले भने, ‘विकास र समृद्धिको मुद्दा लिएर म अघि बढिरहेको छु ।'

काठमाडौं- ५ मा ईश्वर पोखरेले ०५६ सालमा १५ हजार नौ सय ७५ मत ल्याएर चुनाव जितेका थिए । ०६४ सालको संविधानसभा चुनावमा कांग्रेसका नरहरि आचार्यले १३ हजार दुई सय ४५ मत ल्याएर विजय हासिल गरे भने पोखरेल नौ हजार एक सय २० मतमा खुम्चिए । ०७० को दोस्रो संविधानसभा निर्वाचनमा आचार्यले १५ हजार ३ सय ६४ मत ल्याए भने पोखरेलले १४ हजार सात सय २३ मत ल्याएका थिए । विवेकशील साझाका थापाले भने यसअघिको निर्वाचनमा उपस्थिति जनाए पनि खासै लोकप्रिय मत प्राप्त गर्न सकेका थिएनन् ।

काठमाडौं महानगरपालिकाको वडा नं. २, ३, ४ र ५, टोखा नगरपालिकाको वडा नं. २ऽ ३, ४, ५, ६ र ७ तथा बूढानीलकण्ठ नगरपालिकाको वडा नं. ३, ४, ५, ६ र ७ मा फैलिएको यस क्षेत्रका कुल मतदाता ६४ हजार पाँच सय ५० छन् । जुन संख्या दोस्रो संविधानसभा निर्वाचनमा ५५ हजार तीन सय ७७ थियो ।