ढिकुरे सभाजुलुस निषेधित क्षेत्र

नुवाकोट :  जिल्ला प्रशासन कार्यालय नुवाकोटले लिखु गाउँपालिकाको वडा नं. १ रहेको ढिकुरेवजारलाई बिहीबार निषेधित क्षेत्र घोषणा गरेको छ । ढिकुरे बजार क्षेत्रमा एक दिनका लागि सभा जुलुस गर्न नपाइने गरी सभा जुलुश, राजनीतिक कार्यक्रम निषेधित क्षेत्र घोषणा गरेको प्रमुख जिल्ला अधिकारी विरेन्द्रकुमार यादवले बताए ।

प्रशासनले स्थानीय प्रशासन ऐन २०२८ को दफा ६ को उपदफा ३ बमोजिम पूर्वमा चौघडा, पश्चिममा वर्राफेदी डाँडा, उत्तरमा माझपानी र दक्षिणमा चौघडा चारकिल्ला भित्र पर्ने ढिकुरे वजारमा बिहीबार कुनै पनि सभा जुलुस गर्न नपाइने गरी निषेधित क्षेत्र घोषणा गरेको हो । बिहीबार ढिकुरे बजारमा नेपाली काँग्रेसको र त्यसको केही पर वाम गठबन्धनको चुनावी सभा हुन लागेको र परिस्थितिको विश्लेषण गरेर स्थिति गम्भीर देखिएकाले निषेधित क्षेत्र घोषणा गर्नुपरेको प्रमुख जिल्ला अधिकारी वीरेन्द्र यादवले जानकारी दिए ।

‘हामी सभा होस नै भन्ने चाहन्थ्यौं ।तर, पछिल्लो केही दिनमा विकसित घटनाक्रमहरु समेतको अध्ययनले सुरक्षा अवस्था सुदृढ बनाउन समस्या देखिएपछि यस्तो निर्णय लिईएको हो' यादवले भने ।

ढिकुरेबजारमा नेकपा एमालेका वरिष्ठ नेता तथा पूर्व प्रधानमन्त्री माधवकुमार नेपाल तथा कांग्रेसका केन्द्रीय सदस्य गगनकुमार थापा र क्षेत्र नं. १ का उमेदवार डा. रामशरण महत सहितका नेताहरुले सम्वोधन गर्ने पूर्वनिर्धारित कार्यक्रम थियो ।