शान्तिपूर्वक मतदान गराउन सर्वदलीय बैठकको तयारी : दबाबमा थबाङी

लिबाङ : दोस्रो संविधानसभा निर्वाचनमा शून्य मतदान भएको थबाङमा यसपटक के होला भन्ने चासो बढेको छ । पहिलो चरणमा हुन लागेको प्रतिनिधिसभा तथा प्रदेशसभा निर्वाचनका लागि मतदाता भने दबाबमा देखिएका छन् । निर्वाचनविरोधी गतिविधि गरिरहेको नेत्रविक्रम चन्द ‘विप्लव' नेतृत्वको नेकपा शून्य मतदान गराउन लागिपरेको छ । निर्वाचन पक्षधर शक्ति जसरी भए पनि मतदान गर्न कस्सिएका छन् ।

नेकपाले मतदातालाई निर्वाचन प्रचार, मतदानमा भाग नलिन तथा निर्वाचन खारेजीमा सघाउन भन्दै मतदातालाई पत्राचार गरिरहेको छ । नेकपाको थबाङ गाउँ कमिटीले परिवारका मूली वा मतदातालाई सम्बोधन गरेर पत्र पठाएको स्थानीयवासी बताउँछन् । अटेर गरी मतदान गर्न गए त्यसपछि उत्पन्न हुने ‘खतरनाक परिस्थिति'को भागीदार आफैं हुनुपर्ने चेतावनीसमेत नेकपाले दिएको छ । नेकपाले यो निर्वाचनबाट संसदवादी शक्तिले भनेजस्तो शान्ति, समृद्धि र विकास स्थापित नहुने जिकिर गरेको छ ।

‘संसदीय निर्वाचनले अस्थिरता, परनिर्भरता, गरिबी र भ्रष्टाचारको अन्त्य हुँदैन, त्यसका लागि एकीकृत जनक्रान्ति आवश्यक छ भन्ने व्यहोराको पत्र थमाएका छन्', एक मतदाताले भने । नेकपाका नेताले स्थानीय तह निर्वाचनमा स्वतन्त्र उम्मेदवारीसमेत दिएका थिए । पार्टी नीतिविपरीत निर्वाचनमा भाग लिएको भन्दै उक्त पार्टीले स्थानीय नेता तथा कार्यकर्तालाई कारबाहीसमेत गरेको थियो । स्थानीय तह निर्वाचनपछि विप्लव आफैं थबाङ पुगेका थिए । यद्यपि, नेकपाले सबैको कारबाही फुकुवा गरिसकेको छ । विप्लव फर्किएदेखि स्थानीय नेता तथा कार्यकर्ताले निर्वाचनविरोधी गतिविधि गर्दै आएका छन् । उनीहरूले घरका भित्ता र सार्वजनिक स्थानमा ‘नो भोट' लेखेका छन् । माइकिङसमेत भइरहेको स्थानीय बताउँछन् ।

माओवादी केन्द्रका नेता तथा कार्यकर्ताले भने निर्वाचनको पक्षमा अभियान चलाइसकेको छ । माओवादी नेता वर्षमान पुन निर्वाचन प्रचारका क्रममा तीन पटक थबाङ पुगिसकेका छन् । वाम गठबन्धनले चुनावी सभासमेत गरिसकेको छ । दुई हजार सात सय ७२ मतदाता रहेको थबाङ गाउँपालिकाका दुई वडामा नेकपा र माओवादी केन्द्रबीच प्रतिष्ठाको लडाइँ चलिरहेको छ । नेकपाले थबाङबाट निर्वाचन खारेजीको सन्देश दिन खोजेको देखिएको छ । गत फागुन १ गते काठमाडौं खुलामञ्चमा महाधिवेशन उद्घाटन गरी थबाङमा १० दिन बन्दसत्र चलेको थियो । यहींबाट पार्टीको नाम नेकपा बनेको थियो । एकीकृत जनक्रान्तिको कार्यदिशा पारित भएको थियो ।

निर्वाचनमा अप्रिय घटना हुन नदिन यहाँ सुरक्षा व्यवस्था चुस्त पारेको स्थानीय प्रशासनले जनाएको छ । नेपाली सेना, सशस्त्र, प्रहरी र म्यादी प्रहरी परिचालित भएका छन् । थबाङमा उच्च सुरक्षा व्यवस्था मिलाइएको सुरक्षा अधिकारीले जानकारी दिएका छन् । ‘नेपाली सेना, सशस्त्र र प्रहरीको संयुक्त टोली थबाङमा परिचालित छ', रोल्पाका प्रहरी नायब उपरीक्षक ज्ञानेन्द्रप्रसाद फुयाँलले भने, ‘उच्च सुरक्षा सतर्कता अपनाइएको छ ।'

प्रमुख जिल्ला अधिकारी डा. डिजन भट्टराईले थबाङमा सुरक्षा व्यवस्था पर्याप्त रहेको दाबी गरे । निर्वाचन कर्मचारी टोली मंगलबार नै कडा सुरक्षासहित थबाङ पुगिसकेको उनको भनाइ छ । ‘मतदान प्रयोजनका लागि सबै सामग्रीसहित हामी थबाङमा सुरक्षित रूपमा पुगिसकेका छौं', साविक गाविस भवन मतदानस्थल अधिकृत गोपीराज बुढाले भने । शान्तिपूर्ण रूपमा मतदान सम्पन्न गर्न सर्वदलीय परामर्श बैठकको तयारी भइरहेको जनाइएको छ ।