प्रहरीमाथि गोली चलाउने तीन जना पक्राउ

सिरहा: सिरहामा दुई प्रहरीमाथि गोली चलाउने तीन यूवकलाई धनुषा प्रहरीले पक्राउ गरेको छ। सोमबार धनुषाको सहिद नगरपालिका वडा नम्बर १ बाट उनीहरुलाई पक्राउ गरिएको प्रहरीले जनाएको छ। पक्राउ पर्नेहरुमा सोही ठाउँका ३० बर्षीय शिव भन्ने जयकुमार राय, २७ बर्षीय मनोज राय र १९ बर्षीय सुरेन्द्र राय छन्।

उनीहरुका साथबाट एक थान चाइनिज पेस्तोल र खालि म्यागजिन पनि बरामद गरिएको छ। जिल्ला प्रहरी कार्यालय धनुषाका प्रहरी नायव उपरीक्षक प्रविण धितालले सिरहामा प्रहरीमाथि गोली चलाएर फरार तीन यूवकलाई पक्राउ गरेको पुष्टि गरेका छन्। उनले पक्राउ परेकाहरुमाथि अनुसन्धान भइरहेको बताए । उनले भने, ‘म्याद थप गराएर उनीहरुलाई सोधपुछ गर्दैछौं।'

आइतबार दिउँसो स. ५ प. ९२३९ नम्बरको मोटरसाइकलमा चढेर आएका युवाहरुले सुरक्षाकर्मीले चेकचाँज गरिरहेका बेला गोली प्रहार गरेका थिए। सिरहाको कल्याणपुर नगरपालिका ५ निर्दनामा सुरक्षाकर्मीले उनीहरुसँग गाडीको कागजात माग्ने क्रममा मोटरसाइकल पछाडि सवार यूवकले सुरक्षाकर्मीमाथि गोली चलाएका थिए। गोली लागेर प्रहरी जवान मायाराम यादब र म्यादी आदर्श कुँवर घाइते भएका थिए। घाइते प्रहरीको काठमाडौंमा उपचार भइरहेको छ।