तात्दै काठमाडौंको चुनावी माहोल

काठमाडौं: प्रमुख दलले राजधानी काठमाडौंमा प्रचारप्रसार तीव्र पारेका छन् । उम्मेदवारी मनोनयनसँगै घरदैलोमा व्यस्त रहे पनि ठूलो सभा नगरेका दलहरूले शीर्ष नेताको सहभागितामा चुनावी सभा गर्न लागेका हुन् ।

दस क्षेत्र रहेको काठमाडौंका सबै ठाउँमा लोकतान्त्रिक र वाम गठबन्धनबीच कडा प्रतिस्पर्धा हुने आकलन गरिएको छ । यद्यपि स्थानीय तह चुनावमा काठमाडौं महानगरमा उल्लेख्य मत पाएको विवेकशील साझा पार्टीलाई पनि दह्रो प्रतिस्पर्धीका रूपमा हेरिएको छ ।

विवेकशीलले केही क्षेत्रमा चर्चित अनुहारलाई उठाएपछि परम्परागत रूपमा प्रमुख दलले पाउँदै आएको काठमाडौंको मत बाँडिने सम्भावना छ । उसले पनि अन्यत्रभन्दा काठमाडौंकै क्षेत्रलाई बढी प्राथमिकतामा राखेको देखिन्छ ।

क्षेत्र १ मा वाम गठबन्धनबाट माओवादीका अनिल शर्मा, कांग्रेसका प्रकाशमान सिंह र विवेकशील साझाका रवीन्द्र मि श्रबीच कडा प्रतिस्पर्धा हुने देखिएको छ । यसअघिका निर्वाचनमा कांग्रेसका सिंहले जितेको यो क्षेत्रमा यसपटक वाम गठबन्धनका शर्मा र विवेकशीलका मि श्र दुवैले चुनौती दिइरहेका छन् । क्षेत्र २ मा पनि एमालेका वरिष्ठ नेता माधव नेपाललाई कांग्रेसका दीपक कुइँकेल र विवेकशीलका सूर्यराज आचार्यले दह्रो दाबेदारी दिएका छन् ।

त्यस्तै क्षेत्र ५ मा एमाले महासचिव ईश्वर पोखरेल, कांग्रेसका प्रकाशशरण महत र विवेकशीलका संयोजक उज्ज्वल थापाबीच कडा प्रतिस्पर्धा हुने देखिएको छ ।

एमाले-माओवादी र कांग्रेस-राप्रपा दुवैले १० वटै क्षेत्रलाई आफ्नो प्रतिष्ठासँग जोडेर हेरेका कारण काठमाडौंको चुनावले सबैको ध्यान खिचेको छ । वाम गठबन्धनले मंगलबार क्षेत्र १ मा पर्ने बानेश्वरमा जनसभा आयोजना गरेको छ । उक्त क्षेत्रका वाम गठबन्धनका उम्मेदवार शर्माका अनुसार दिउँसो २ बजे बानेश्वर चोकमा हुने जनसभालाई एमाले अध्यक्ष केपी शर्मा ओली, माओवादी अध्यक्ष पुष्पकमल दाहाल, एमाले वरिष्ठ नेता माधव नेपाललगायतले सम्बोधन गर्दै छन् ।

यता कांग्रेसको निर्वाचन प्रचारप्रसार समिति संयोजक गगन थापाका अनुसार कांग्रेसले समेत काठमाडौंमा शीर्ष नेताको उपस्थितिमा केही दिनभित्रै सभा गर्दै छ । कांग्रेसका शीर्ष नेताहरू मंगलबारदेखि चुनावी प्रचारका लागि देश दौडाहामा जाँदै छन् । सभापति शेरबहादुर देउवासहितका केही नेता भने यस अघिदेखि नै विभिन्न जिल्लामा खटिइरहेका छन् ।