एम्बुस विस्फोटमा उम्मेदवारसहित चार घाइते
गाईघाट : नेपाली कांग्रेस उदयपुरका उम्मेदवार नारायण कार्कीलाई लक्षित गरी अज्ञात समूहले बुधबार बिहान थापेको एम्बुस पड्कँदा उम्मेदवारसहित ४ जना घाइते भएका छन्।
उदयपुरगढी गाउँपालिका ६ नेपालटार बजारमा आयोजित चुनावीसभालाई सम्बोधन गर्न जाँदै गरेका प्रतिनिधिसभा २ का कांग्रेसका उमेदवार कार्कीलाई लक्षित गरी सोही वडाको दनुवारबेसीमा थापिएको एम्बुस विस्फोट भएको हो।
विस्फोटनमा उम्मेदवार कार्की, उदयश्री बहुमुखी क्याम्पस कटारीका नेविसंघका सभापति मिरा कटुवाल, नाम नखुलेका चालक र अन्य एक कार्यकर्ता घाइते भएको प्रमुख जिल्ला अधिकारी चन्द्रमान श्रेष्ठले बताए।
प्रजिअ श्रेष्ठका अनुसार घाइतको अवस्था गम्भीर रहेकाले उपचारका लागि हेलिकप्टर मगाइएको छ। कार्कीको एउटा हात चलेको छैन भने कटुवालको पैतलामा चोट लगोको जनाइएको छ।
घटनास्थल सदरमुकाम गाईघाटदेखि ४५ किलोमिटर पश्चिम क्षेत्रमा रहेकाले घटनास्थलतर्फ भर्खरै प्रहरी पठाइएकाले विस्तृत विवरण आउन समय लाग्ने प्रहरीले जनाएको छ।
मंगलबार मात्र नेपाली कांग्रेस प्रतिनिधिसभा निर्वचन क्षेत्र १ का उम्मेदवार डा. नारायण खड्का र सोही क्षेत्रको प्रदेससभा २ का कांग्रेसका उम्मेदवार हिमाल कार्कीलाई लक्षित गरी बम विस्फोट गराइएको थियो।
प्रतिक्रिया दिनुहोस !
