आर्मी र मनाङको उपाधि जित्ने दाउ
काँकडभिट्टा : झापाको काँकडभिट्टामा जारी राजधानी बाहिरको सर्वाधिक पुरस्कार राशिको मेची नेत्रालय काँकडभिट्टा गोल्डकप फुटबल प्रतियोगितामा शुक्रबार मनाङ मस्र्याङ्दी क्लब र विभागीय प्रतिद्वन्द्वी त्रिभुवन आर्मी क्लबबीच उपाधि भिडन्त हुँदैछ । प्रतियोगिताको उपाधि जित्नेमा दुवै टोली ढुक्क रहेको बताएका छन् ।
त्रिभुवन आर्मी क्लबका प्रशिक्षक नवीन न्यौपानेले आफ्नो टोली ‘रिदम’मा रहेकाले उपाधि जित्ने पक्का भएको बताए । ‘म आशावादी छु, हाम्रो टोलीले पक्का पनि जित हासिल गर्नेछ’, न्यौपानेले भने । झापामा आर्मी र मनाङको भेट दोस्रोपटक हुन लागेको हो । यसअघि सताक्षी गोल्डकपको फाइनलमा आर्मीले मनाङसँग खेलेको थियो । उक्त गोल्डकपको उपाधि आर्मीले नै हात पारेको थियो ।
तर, आर्मीलाई मनाङसँग उपाधि खोस्नु सहज भने छैन । आर्मीका प्रशिक्षक न्यौपानेले मनाङ सेटमा खेल्ने टोली भएकाले त्यही अनुसारको रणनीतिमा खेल्ने बताए । ‘मनाङमा नौजना राष्ट्रिय टोलीमा आबद्ध खेलाडी छन् । त्यही कारण हामीलाई पनि त्यही अनुसारको रणनीति बनाउनु आवश्यक छ’, उनले भने । उनले आफ्नो टोलीले खेलको सुरुआतदेखि नै अट्याकिङ गेम खेल्ने बताए ।
आर्मीका कप्तान भरत खवासले आफ्नो टिमका चर्चित खेलाडी नवयुग श्रेष्ठ घाइते भएका कारण उनको अभाव खड्किएको बताए । तर, उनको स्थानमा नयाँ खेलाडी दिनेश हेनजनले राम्रो खेलिरहेका कारण श्रेष्ठको अभाव परिपूर्ति हुने आशा खवासले राखे । ‘हामी कमजोर छैनौं । फाइनलमा हाम्रो रणनीति अन्य खेलको भन्दा फरक हुन्छ’, खवासले भने ।
मनाङ मस्र्याङ्दी क्लबका कप्तान विराज महर्जनले आर्मीसँग सताक्षी गोल्डकपको बदला लिने सुनौलो मौका भएको बताए । उनले आफ्नो टोलीले गरेको गल्तीलाई सुधारेर फाइनलका लागि मैदानमा उत्रने बताए । ‘सताक्षी गोल्डकपमा हाम्रो टोलीबाट भएको कमीकमजोरीलाई सुधार गरेर यसपटकको उपाधि जित्ने प्रयत्नमा छौं’, महर्जनले भने । उनले आफ्नो टोलीमा स्ट्राइकिङ पावर कमजोर भएको स्वीकार गरे ।
यसअघि मनाङले खेलेका दुईवटा खेलमा टाइब्रेकरमा मात्र जित निकालेको थियो । उनले यसपटक भने निर्धारित समयमै गोल स्कोर गर्ने प्लान रहेको बताए । मनाङले दुई महिनाअघि चितवनमा भएको जेसिस कपमा सशस्त्र प्रहरीको एपीएफ क्लबलाई पराजित गर्दै उपाधि जितेको थियो । उनले आफ्नो टोलीले खेल्ने गरेको ४-३-३ को सेटलाई फाइनलमा ४-४-२ को सेटमा खेल्ने बताए । प्रतियोगिताको विजेताले आठ लाख रुपैयाँ पुरस्कार पाउनेछ । उपविजेताले चार लाख एक हजार रुपैयाँ पाउनेछन् ।