थारू मन्त्रीबीच रोचक प्रतिस्पर्धा

धनगढी : कैलाली ३ थारू बाहुल्य क्षेत्र हो । यो क्षेत्रमा यसपालि थारू समुदायकै दुई पूर्वमन्त्रीबीच रोचक प्रतिस्पर्धा भइरहेको छ ।वाम गठबन्धनबाट माओवादी केन्द्रका गौरीशंकर चौधरी र लोकतान्त्रिक गठबन्धनबाट रामजनम चौधरी चुनावी मैदानमा छन् । गौरीशंकर पूर्व कृषिमन्त्री हुन् भने रामजनम पनि पटक-पटक मन्त्री भइसकेका छन् ।

‘एउटै समुदायका दुई मन्त्रीबीचको प्रतिस्पर्धा रोचक देखिएको छ’, क्षेत्र नम्बर ४ को घोडाघोडी नगरपालिकाका अम्बादत्त पाण्डेले भने । रामजनम चौधरी २०६४ सालमा कांग्रेसले टिकट नदिएको भन्दै रामजनम विजय गच्छदारको पार्टीमा गएर समानुपातिक सभासद बनेका थिए । पुराना कांग्रेसी राजमजनम यसपालि कांग्रेसमै फर्किएका हुन् । कांग्रेसमा रहेका बेला पनि रामजनम चौधरी त्यो क्षेत्रको हिरो हुन् । उनले २०४८ को आमनिर्वाचन, २०५१ सालको मध्यावधि र २०५६ सालको आमनिर्वाचनमा कांग्रेसका तर्फबाट अनवरत जिते ।

२०६४ सालको संविधानसभा निर्वाचनमा प्रत्यक्ष चुनाव नलडे पनि रामजनम समानुपातिकमा सभासद चुनिए । झन् २०७० सालको निर्वाचनमा उनले कांग्रेसका आफ्नै सहयात्री नारायणदत्त मि श्रलाई ११ सय मतान्तरले पराजित गर्दै सभासद जिते । ‘मैले क्षेत्र ३ का लागि धेरै काम गरेको छु, त्यहाँको हिँड्न नसक्ने बाटोमा ग्राभेल गरेको छु, केही सडक अहिले कालोपत्रेको योजनामा परेका छन्’, उनले भने ।

वाम गठबन्धनका उम्मेदवार गौरीशंकर चौधरी तत्कालीन नेकपा माओवादीले थालेको जनयुद्धमा जनमुक्ति सेनाका कमान्डर हुन् । २०७० सालको निर्वाचनमा कैलाली ५ बाट लेखराज भट्टसहित सुदूरपश्चिममा कोही पनि नजितेका बेला गौरीशंकरले मात्रै साविकको क्षेत्र ४ बाट चुनाव जितेका थिए । ‘सुदूरपश्चिममा एक सिट पनि माओवादीले नजितेका बेला कैलालीबाट जित्ने एक्लो व्यक्ति हुँ,’ यसपालि त झन् वाम गठबन्धन भएको छ । मेरो जित निश्चित छ’, उनले भने ।

कैलाली ३ मा वाम गठबन्धनबाट पूर्वकृषिमन्त्री गौरीशंकर चौधरी र लोकतान्त्रिक रामजनम चौधरी चुनावी मैदानमा छन् ।

कैलाली ३ मा घोडाघोडी नगरपालिका पूरै, भजनी नगरपालिकाका १, २, ३, ४, ५, ७, र ९ तथा कैलारी गाउँपालिकाका १, २, ३, ४, ५, ७ र ८ परेका छन् । यहाँ ४७ हजार ८९२ जना मतदाता छन्, तीमध्ये ५५ देखि ६० प्रतिशत थारू नै छन् । ‘रामजनमले थरुहट आन्दोलनपछि चटक्क आन्दोलन छोडेकाले पनि उहाँको मतदातामाझ त्यत्ति राम्रो हुन सकेको छैन’, गौरीशंकरको आरोप छ ।

टीकापुर घटनामा २५ जना जेलमा छन् । उनकै पार्टीका केन्द्रीय सदस्य लक्ष्मण थारू पनि कैलाली कारागारमा छन् । फोरम लोकतान्त्रिक कांग्रेसमा विलय भए पनि लक्ष्मण थारू राजपामा गएका छन् । यसले पनि रामजनमप्रति थारुको ‘सेन्टमेन्ट’ कम हुने आंकलन गर्न थालिएको छ । तर रामजनम भने थरुहट आन्दोलनमा आफ्नो पूर्ण सहभागिता रहेको र सरकारमा गएका बेला हरसम्भव प्रयास गरेको दाबी गर्छन् । ‘सरकारमा गएका बेला पनि हामीले जेलमा भएकालाई छुटाउन धेरै प्रयास गर्‍यौं । टीकापुर घटनामा क्षतिपूर्ति दिलाउन सफल भयौं’, उनको तर्क छ ।

स्थानीय तहको मत परिणाम हेर्ने हो भने बाम गठबन्धन झन्डै साढे पाँच हजार मतले अगाडि छ । ‘हामी संगठनकै भोटमा साढे पाँच हजारले अगाडि छौं, त्यो पनि जित्ने आधार हो’, गौरीशंकरले भने।