देउवाको अपराजित यात्रा

 डडेल्धुरा : प्रधानमन्त्री एवं कांग्रेस सभापति शेरबहादुर देउवाले अपराजित यात्रालाई यसपटक पनि कायमै राखे । देउवाले ०४८ सालदेखि डडेल्धुरा जिल्लाबाट चुनाव जित्दै आएका छन् । देशभर वाम गठबन्धनको लहर देखिए पनि डडेल्धुरामा देउवाको विरासतलाई हल्लाउन सकेन । डडेल्धुराको एक मात्र निर्वाचन क्षेत्रबाट प्रतिनिधिसभाका लागि देउवा विजयी भएका हुन् ।

गणनाको सुरुवाती चरणदेखि नै देउवाले प्रतिस्पर्धी उम्मेदवारलाई पछि पार्दै आएका थिए । स्थानीय तहको मतपरिणामलाई हेरेर प्रधानमन्त्री देउवा चुनाव हार्ने आकलन वाम गठबन्धनले गरेको थियो । तर, उनले २८ हजार ४४ मत ल्याई विजयी भएका छन् । प्रतिद्वन्द्वी वाम गठबन्धनका खगराज भट्टले २१ हजार १ सय १५ मत ल्याए ।

डडेल्धुराबाट देउवाको यो छैटौं पटक विजय हो । देउवाले डडेल्धुराबाट ०४८, ०५१, ०५६, ०६४ र ०७० मा चुनाव जितेका थिए ।

‘हामीले ०४८ सालदेखि नै भोट दिँदै आएका थियांै । यसपटक पनि आफूले आफ्ना मित्रलाई भोट दियौं’, देउवाका सहपाठी मोहन देउवाले भने ।

‘मान्छेका अनेक कुरा सुन्दा चिन्ता लागेको थियो । आफूले दिएको मतले देउवा जित्नेमा ढुक्क थिए’, विरजित विकले भने, ‘बचपनका साथी देउवा जितेकामा खुसी छु । देश बनाउँछु, गरिबी हटाउँछु भनेर लागेको मान्छेलाई भोट नदिएर कसलाई दिने ? ’

गाउँकै विद्यालयबाट प्राथमिक शिक्षा हासिल गरेका देउवाले राजनीतिशास्त्रमा स्नातकोत्तर र कानुनमा स्नातक तहसम्मको शिक्षा हासिल गरेका छन् ।

देउवा कांग्रेस नेता विश्वेश्वरप्रसाद कोइरालाबाट प्रभावित भई ०२२ सालदेखि राजनीतिमा सक्रिय भएका हुन् । ०३६ सालको आन्दोलन र जनमतसंग्रहमा पनि उनी सक्रियतापूर्वक लागेका थिए ।

०२८ सालमा नेपाल विद्यार्थी संघको सभापतिमा चुनिएका देउवा ०४८ सालको आमचुनावमा डडेल्धुराबाट अत्यधिक मत ल्याई विजयी भई प्रतिनिधिसभामा उपस्थित भएका थिए । गिरिजाप्रसाद कोइराला नेतृत्वको सरकारमा देउवा ०४८ सालमा गृहमन्त्री भएका थिए ।

पटक–पटक १० वर्ष १० महिना जेलजीवन बिताएका देउवा ०६४ र ०७० सालको संविधानसभा निर्वाचनमा डडेल्धुराका साथै कञ्चनपुर जिल्ला र कैलालीबाट विजयी भएका थिए ।

०५२, ०५८, ०६१ र ०७४ साल गरी चार पटक प्रधानमन्त्री बनेका देउवाले आफू विजयी घोषणा भएलगत्तै संविधान कार्यान्वयनका साथै देशलाई समृद्धिको दिशातर्फ लैजाने प्रतिबद्धता व्यक्त गरेका छन् ।

डडेल्धुराका ८१ हजार ७ सय ३२ मतदाताले प्रदेश नम्बर क मा वाम गठबन्धनका पठानसिंह बोहरालाई चयन गरेका छन् भने प्रदेशसभा ख मा कांगे्रसका कर्णबहादुर मल्ललाई छानेका छन् ।