जटिल रोगका बिरामीलाई पाँच हजार भत्ता
काठमाडौं : सरकारले क्यान्सर, मिर्गौला र स्पाइनल इन्जुरी भएका बिरामीलाई आर्थिक सहायतास्वरुप मासिक पाँच हजार रुपैयाँ भत्ता उपलब्ध गराउने भएको छ ।सूर्तिजन्य पदार्थमा सरकारले लिँदै आएको करको केही रकम छुट्याई स्वास्थ्य उपचारमा मिलान गर्ने गरी बिरामीलाई यस्तो भत्ता दिन स्वास्थ्य मन्त्रालयले प्रस्ताव गरेको हो । उपचार गर्दागर्दै पीडितको आर्थिक स्थिति कमजोर हुने भएकाले भत्ता उपलब्ध गराउने निर्णय गरी मन्त्रिपरिषदको आगामी बैठकमा पेस गर्न लागिएको जानकारी स्वास्थ्यमन्त्री दीपक बोहोराले दिए ।
धूमपान तथा सूर्तिसेवनलाई निरुत्साहित गर्न सूर्तिजन्य पदार्थ नियन्त्रण तथा नियमन गर्ने) ऐन २०६८ अनुसार उत्पादकसँग सरकारले ठूलो मात्रामा कर लिने गरेको छ । मन्त्रिपरिषद् बैठकले पास गरेपछि अल्पकालीन रूपमा मिर्गौलाले काम नगरेको (एक्युट रेनल फेलियर), दीर्घकालीन रूपमा मिर्गौलाले काम नगरेको (क्रोनिक रेनल फेलियर), मिर्गौला फेलियर भई डायलासिस गर्नुपर्ने र मिर्गौला प्रत्यारोपण गर्नुपर्ने बिरामीलाई भत्ता दिइने मन्त्रालयले जनाएको छ । त्यस्तै, चोटपटकजन्य र दुर्घटना भएर स्पाइनल इन्जुरी भएका पीडितलाई पनि भत्ता दिइने छ ।
सूर्तिजन्य पदार्थमा सरकारले लिँदै आएको करको केही रकम छुट्याई स्वास्थ्य उपचारमा मिलान गर्ने गरी बिरामीलाई यस्तो भत्ता दिन स्वास्थ्य मन्त्रालयले प्रस्ताव गरेको हो ।
भत्ता उपलब्ध गराउन तत्काल ७८ करोड बजेट आवश्यक पर्छ । मन्त्री बोहोराका अनुसार बिरामीको बढ्दो संख्याका कारण आगामी वर्षदेखि दुई अर्ब बजेट व्यवस्था गर्नुपर्ने देखिएको छ । उनले भने, ‘पीडितको स्वास्थ्य सुविधा र आर्थिक हितका लागि जीवनयापन गर्न सहयोग पु¥याउन भत्ता व्यवस्था गरिएको हो ।’
आर्थिक रूपले विपन्न नागरिकलाई औषधि उपचार खर्च उपलब्ध गराउन सरकारले आर्थिक सहायता उपलब्ध गराउँदै आएको छ । मुटु, क्यान्सर, पार्किसन्स, अल्जाइमर्स, हेड इन्जुरी, स्पाइनल इन्जुरी र सिकलसेल एनिमियाको उपचारका लागि एक लाख रुपैयाँसम्मको औषधि-उपचार सुविधा उपलब्ध गराउँदै आएको छ । मिर्गौला रोगको डायलासिस गर्नुपर्ने बिरामीले तोकिएको सूचीकृत अस्पतालबाट निःशुल्क डायलाइसिस सुविधा पाउँदै आएका छन् ।
विपन्न नागरिक औषधि उपचार कोषमार्फत सरकारले मिर्गौला प्रत्यारोपण गर्नुपर्ने बिरामीलाई मिर्गौला प्रत्यारोपण गर्दा सूचीकृत अस्पतालमार्फत चार लाख रुपैयाँ बराबरको औषधि उपचार सुविधा प्रदान गर्दै आएको छ । त्यस्तै, मिर्गौला प्रत्यारोपणपूर्वको परीक्षणका लागि (अंग ग्रहणकर्ता र अंगदाताका लागि) पचास हजार र प्रत्यारोपणपश्चात औषधि सेवनका लागि एक लाख गरी एकल ५० हजार रुपैयाँ एकमुष्ट शोधभर्ना दिइने व्यवस्था छ ।