'अब आर्थिक समृद्धिको बाटोमा लाग्छौं
निर्वाचित भएपछि कस्तो अनुभव भएको छ ?
राजनीतिक परिवर्तनको मुद्दा टुंगो लगाएका छौं । अब आर्थिक समृद्धिको बाटोमा लाग्ने बेला आयो । जनताले निकै ठूलो जिम्मेवारी बोकाएको महसुस गरेको छु ।
तपाईंले आफ्नो जिल्ला÷क्षेत्रको विकासका लागि तत्काल गर्ने ३ वटा काम के-के हुन् ?
जिल्लाभित्र र जिल्ला भएर बाहिर जाने सडकको स्तरोन्नति र पूर्णता दिने कुरामा मेरो पहिलो प्राथमिकता रहन्छ । एक वर्षभित्र खलंगा-पाँचकटिया, खलंगा-डोल्पाको सीमामा रहेको त्रिवेणी र खलंगा-थलह बजारसम्म बाह्रै महिना बस चल्ने बनाउँछु । यी सबै सडकमा कालोपत्रे गराउँछु ।
दोस्रो, कृषिको व्यवसायीकरणमा जोड दिई स्वरोजगारीको बाटो सिर्जना गर्ने काममा लाग्छु । त्यसका लागि प्रधानमन्त्री आधुनिक कृषि परियोजनाबाट विभिन्न व्यवसायिक खेती र उद्योग सञ्चालनका लागि विभिन्न ठाउँमा जोन, ब्लक र पकेट क्षेत्रको निर्माण गरी काम थालिनेछ ।
तेस्रोे, ५० शैड्ढयाको जिल्ला अस्पतालको सेवा प्रभावमा सुधार ल्याउन आवश्यक प्राविधिक, भौतिक तथा अन्य पूर्वाधारको निर्माण गरी विशेषज्ञ सेवा सुचारु गराउनेछु । साथै शैक्षिक सुधारका लागि आवश्यक काम पनि गर्नेछु । नलसिंहगाड जलविद्युत् आयोजना निर्माणको काम समयमै गराउन सरकारलाइ दबाब सिर्जना गर्नेछु ।
मतदाताको अपेक्षा कस्तो छ ? ती अपेक्षालाई पाँच वर्षभित्र कसरी पूरा गर्नुहुन्छ ?
जनताले हिजो ‘जनयुद्ध’मा त्याग र बलिदान गरेका छन् । निर्वाचनमार्फत सुन्दर र समृद्ध जाजरकोट निर्माण गर्ने जुन सपना छ, त्यसलाई सकार पार्न मैले इमानदारीपूर्वक काम गर्नेछु । चुनावपछि हामी नयाँ मोड र परीक्षणको घडीमा छौं । संक्रमणकालको पनि अन्त्य भयो । अबकोे बाटो भनेकै आर्थिक समृद्धिका अभियानहरूलाई तीव्रता दिएर जनताका गुनासाहरू र मर्काहरूलाई जनताकै साथ लिएर रोजगारी र आर्थिक विकासको यात्रामा अघि बढ्ने हो ।
पाँच वर्षभित्र बन्न बाँकी सबै पूर्वाधार विकास गर्छौं । भेरी करिडोरको निर्माण र स्तरोन्नति, जाजरकोट जुम्ला मोटरबाटो, मध्यपहाडी लोकमार्गको स्तरोन्नति, दाङदेखि जाजरकोट हुँदै रारा जोड्न जाजरकोट र जुम्लाको बीचमा पर्ने कुशे हिमालमा सात किलोमिटर सुरुङ मार्ग खोलेर कर्णाली जोड्ने छोटो बाटो बनाउने र प्रदेश ६ को केन्द्र जाजरकोटलाई बनाउने लक्ष्य छ ।
त्यस्तै नलसिंहगाड जलविद्युत् आयोजना, पर्यटन पूर्वाधार विकास, जडीबुटी प्रशोधन केन्द्रको स्थापना गर्ने गरी काम गर्छौं । जनताको अभिमतलाई कदर गर्दै देश विकासमा पूर्ण रूपमा समर्पित हुनेछु ।
प्रतिक्रिया दिनुहोस !
