गाउँले आफैँले बनाए पदमार्ग
बेनी : अन्नपूर्ण ५ पाउद्वारका गाउँलेले आफ्नै लगानीमा पर्यटकीय गन्तव्य खोप्रालेकसम्म व्यवस्थित पदमार्ग निर्माण गरेका छन् । यस क्षेत्रमा खयरभारानी मन्दिर, महावीर पुनले विकास गरेको वायरलेश इन्टरनेट साथै हिमश्रृङखलाको अवलोकन गर्न आन्तरिक तथा बाह्य पर्यटकको पहुँच बढ्दै गएको छ ।
स्वदेश तथा विदेशमा रहेका स्थानीयवासीले एक करोड रुपैयाँ लगानी गरेर व्यवस्थित पदमार्ग निर्माण गरेका हुन् । भिरालो ठाउँमा सिँढी बनाईएको छ भने ठाउँ ठाउँमा आराम गर्न चौतारा समेत निर्माण गरिएको छ । पाउद्धारका अगुवा राजु पुनले विभिन्न चरणमा १ करोड १५ लाख रुपैयाँ खर्च भएको बताउँदै भने, ‘व्यवस्थित पदमार्गका कारण जंगल र अग्ला डाँडाकाँडा घुम्न थप सहज भएको छ ।’
खयरभारनी मन्दिरमा जनैपूर्णिमाको अवसरमा विशेष पुजापाठ हुने गर्छ । दर्शनका लागि वर्षेनी म्याग्दी, पर्वत र कास्कीबाट हजारौँ भक्तजन पुग्न गरेका छन् । पाउद्धारमा जन्मिएर हाल बेलायतमा बस्दै आएका क्याप्टेन पुनको नेतृत्वमा चन्दा संकलन र श्रमदानबाटै पर्यटक र भक्तजनका लागि बास बस्ने घर समेत निर्माण भएको छ ।
पुनका अनुसार अन्नपूर्ण हिमाल र बराह शिखरको फेदी ४ हजार ६ सय ३० मिटर उचाईमा खयर भारानी थानको समेत पुनः निर्माण गरिएको छ । थानको पुनः निर्माणमा ३९ लाख रुपैयाँ खर्च भएको थियो ।
स्थानीय अगुवा भीम पुनका अनुसार युके, हङकङमा रहेका पाउद्धारबासीको सहयोग, गाउँलेको श्रमदान, विभिन्न समूहबाट रकम जुटाएर भौतिक पूर्वाधार विकास गरिएको थियो । ‘यहाँ आउने भक्तजन र पर्यटकबाट हामी यो लगानी उठाउँछौ । उनीहरुबाट शुल्क लिएर होइन, होटल र विभिन्न स्थानमा राखिएको सहयोग पेटिकाबाट रकम प्राप्त हुन्छ’, उनले भने ।
इन्टरनेटको समेत व्यवस्था भएका कारण खोप्रामा विदेशी पर्यटकको आकर्षण बढ्दै गएको पुनको भनाई छ । ‘समितिले यस क्षेत्रको पूर्वाधार निर्माणमा सहयोग गर्नेहरुको सम्मानका लागि शिलालेख समेत राख्न सुरु गरेको छ ।’ उनले भने ।